गएको साता (चैत २४) मा लुम्बिनी प्रदेश सरकारका मुख्यमन्त्री शंकर पोखरेलविरुद्ध अविश्वासको प्रस्ताव ल्याउन तीन दलले हस्ताक्षर अभियान सञ्चालन गरेको हल्ला फैलियो । 

आफू नेतृत्वको सरकार ढाल्न खोजेको सुइँको पाएलगत्तै मुख्यमन्त्री पोखरेलले प्रदेश सभाको हिउँदे अधिवेशन अन्त्यको सिफारिश गरे भने जनता समाजवादी पार्टी (जसपा) संसदीय दलका नेता सहस्रराम यादव र प्रमुख सचेतक सन्तोष पाण्डेयलाई बोलाएर छलफल गरे । 

तर अहिलेसम्म मुख्यमन्त्री पोखरेलले न जसपाको साथ पक्का गरेका छन्, न त सरकारमै रहेर नयाँ सरकार बनाउन हस्ताक्षर अभियान थाल्ने माओवादी केन्द्रका मन्त्री हटाउन ।

सरकार ढाल्न कांग्रेस र माओवादी केन्द्र एकढिक्का भए पनि जसपा अनिर्णित छ । सत्ताको चाबी बोकेर बसेको जसपा अनिर्णित बन्दा लुम्बिनी सरकार अन्योलमा छ ।

राजनीतिक विश्लेषक मनिकर कार्की जसपाले ग्राउण्ड क्लियर गर्न अब ढिला गर्न नहुने बताउँछन् ।

‘अन्यौल अब लम्ब्याउनु हुँदैन,’ कार्कीले भने, ‘केन्द्रदेखि प्रदेशसम्म जसपाकै अन्योलले नयाँ सरकारका विषय अल्झिएका छन् । यो विषयमा अझै ढिला गर्ने हो भने समस्याका हाँगाबिँगा झन् बढ्दै जानेछन् । मुलुक झनै अप्ठ्यारोमा पर्नेछ ।’ 

लुम्बिनीमा रहेका जसपाका ६ सांसदमध्ये ५ जना उपेन्द्र यादव र बाबुराम भट्टराई निकट छन् । संसदीय दलका नेता सहस्रराम यादव, प्रमुख सचेतक सन्तोष पाण्डेय, विजयबहादुर यादव, सुमन शर्मा रायमाझी, पुर्मती ढेगा, सुमन शर्मा रायमाझी यादव र भट्टराई निकट हुन् भने, कल्पना पाण्डे महन्त ठाकुर तथा राजेन्द्र महतो निकट मानिन्छिन् । 

सरकारमै बसेर लुम्बिनी प्रदेशका अन्तरिक मामिला तथा कानून मन्त्री कुलप्रसाद केसीले छिट्टै नयाँ सरकार बन्ने बताएका छन् । 

केन्द्रको समीकरण अनुसार प्रदेशमा पनि नयाँ सरकार बन्ने उनको भनाइ छ ।

लुम्बिनी सरकारका प्रवक्ता तथा भौतिक पूर्वाधार तथा विकास मन्त्री बैजनाथ चौधरीले जसपा माओवादी र कांग्रेससँग सहकार्य नगरी आफूहरूसँगै आउने दाबी गरे । ‘लुम्बिनीमा शंकर पोखरेलको विकल्पमा अर्को सरकार बन्नै सक्दैन, बाँकी दुई वर्षको कार्यकाल पनि यही सरकारले पूरा गर्नेछ ।’ 

जसपा सरकारमा ‘इन’ भएपछि माओवादीका मन्त्री ‘आउट’ हुने चौधरीको भनाइ छ । 

यता माओवादी केन्द्रका प्रमुख सचेतक तुलाराम घर्ती मगरले सरकार गठनको प्रक्रिया नरोकिएको बताए ।

‘जसपामा केन्द्रको टावरले गर्दा अलमलमा देखिएको छ । नयाँ वर्षसँगै नयाँ सरकार गठनको प्रक्रिया अगाडि बढाउछौं,’ घर्तीले लोकान्तरसँग भने । 

लुम्बिनीमा ८७ सदस्यीय प्रदेशसभामा माओवादीका दुई सांसद पदमुक्त भएका छन् । नयाँ सरकार बनाउनका लागि ४३ सांसद आवश्यक पर्छ ।

कांग्रेस, माओवादी र जसपा एक भए नयाँ सरकार बन्न बहुमत पुग्छ । प्रदेश सभामा एमालेका ४१ सांसद छन् । कांग्रेसका १९, माओवादीका सभामुखसहित १८ र जसपामा ७ र राष्ट्रिय जनमोर्चाका १ सांसद छन् । 

कांग्रेसका प्रमुख सचेतक फकरुद्धिन खानले जसपाले संस्थागत निर्णय गर्न सक्दा प्रदेशमा नयाँ सरकार गठनमा ढिलाइ भएको बताए । 

‘माओवादी र कांग्रेसमा कुनै समस्या छैन । नयाँ सरकार गराउन जसपा, माओवादी र कांग्रेसबीच एक खालको सहमति पनि भएको हो । तर, जसपा आफैँमा अल्झिँदा प्रगति हुन सकेन,’ खानले भने । 

जसपा संसदीय दलका नेता सहस्रराम यादवले केन्द्रदेखि प्रदेशसम्म एउटै स्थिति हुँदा नयाँ सरकार गठनमा केही समस्या आएको बताए ।

छिट्टै बैठक बसेर मुख्यमन्त्रीलाई समर्थन गर्ने कि विपक्षीसँग गठबन्धन बनाएर जाने भन्ने निर्णय हुने उनको भनाइ छ ।