आफ्नै नेतृत्वमा नयाँ सरकार गठनको निर्णय गरेको नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच मंगलवार राति भेटवार्ता भएको छ । धुम्वराही चप्पल कारखाना नजिक व्यवसायी प्रमोद राणाको निवासमा देउवा र प्रचण्डबीच भेटवार्ता भएको सुरक्षा स्रोतले बतायो ।

स्रोतका अनुसार दुवै नेता सुरक्षा सहयोगी बिनै ती व्यवसायीको घरमा पुगेका थिए । वैकल्पिक सरकार गठनको गृहकार्यमा लागेको प्रचण्ड र देउवाबीच मंगलवार भएको भेटवार्तालाई अर्थपूर्ण रुपमा हेरिएको छ ।
मंगलवार दिउसो कांग्रेस सभापति देउवासँग जसपाका नेता डा बाबुराम भट्टराई र उपेन्द्र यादवले भेटवार्ता गरेका थिए ।

चैत्र २० गते कांग्रेसले प्रधानमन्त्री केपी शर्मा ओलीको राजीनामा माग गर्दै आफ्नै नेतृत्वमा सरकार बनाउने निर्णय गरेको थियो । त्यसको एक सातापछि गत शुक्रवार कांग्रेसले माओवादी केन्द्र र जसपासँग सरकार बनाउनको लागि सहयोग मागेको थियो । माओवादीले समर्थन गरेपनि जसपाले पार्टीमा छलफल गरेर निर्णय  दिने बताएको थियो ।

नयाँ सत्ता समीकरणका लागि निर्णायक मानिएको जसपाले प्रधानमन्त्री ओलीलाई नै समर्थन गर्ने कि कांग्रेसको नेतृत्वमा सरकार बनाउन पहल गर्नेबारे अहिलेसम्म औपचारिक निर्णय गर्न सकेको छैन ।