प्रधानमन्त्री निवास बालुवाटारमा अनुष्ठान गरेर भगवान राम र सीताको मूर्ति चितवनको माडी अयोध्यापुरी पठाइएको छ ।

बालुवाटारमा आयोजित कार्यक्रममा प्रधानमन्त्री केपी शर्मा ओलीले राम तथा सीताको मूर्ति पूजा गरेर रथयात्रा सहित चितवनस्थित अयोध्यापुरीतर्फ पठाइएको हो । 

रामनवमीको दिन अयोध्यापुरीमा मूर्ति प्रतिस्थापन गर्ने प्रधानमन्त्री ओलीले यसअघि नै घोषणा गरेका थिए ।

भक्तपुरका कालीगढहरूले राम, सीता, लक्ष्मण र हनुमानको मूर्ति बनाएका हुन् । फूलमालाले सजाएर ४ वटा गाडीमा राखेर मूर्ति चितवन पठाइएको हो । 

मूर्ति केही समयदेखि प्रधानमन्त्री निवास बालुवाटारको प्रांगणमा राखिएको थियो । बालुवाटारमा मंगलवार आयोजित कार्यक्रममा साधुसन्त र पूजारीहरू समेत उपस्थित थिए । 

भानु जयन्तिको अवसरमा आयोजित कार्यक्रममा प्रधानमन्त्री ओलीले भगवान रामको जन्मभूमि चितवनको अयोध्यापुरी भएको बताउँदै अयोध्यापुरीलाई धार्मिक स्थलको रूपमा विकास गर्ने बताएका थिए ।