गण्डकी प्रदेशका मुख्यमन्त्री गुरुङविरुद्धको अविश्वासको प्रस्तावमा आजै मतदानको तयारी

गण्डकी प्रदेशका मुख्यमन्त्री पृथ्वी सुब्बा गुरुङविरुद्ध पेश गरेको अविश्वासको प्रस्तावमाथि प्रदेश सभामा बुधवार नै मत विभाजन हुने भएको छ ।

प्रदेश सभाको बुधवारको बैठकको कार्यसूचीमा अविश्वासको प्रस्ताव निर्णयार्थ पेश गर्ने उल्लेख छ । बैठकको शुरुमा छलफल गराउने, त्यसपछि मुख्यमन्त्री गुरुङले जवाफ दिने र अन्तिममा मत विभाजनमा लैजाने तयारी छ । 

सोमवार शुरु प्रदेश सभाको विशेष अधिवेशनको शुरुको दिनमै कांग्रेस संसदीय दलका नेता कृष्ण चन्द्र पोखरेल नेपालीले गुरुङविरुद्ध अविश्वासको प्रस्ताव पेश गरेका थिए । नेपाली कांग्रेस, माओवादी केन्द्र र जसपाका २८ जना सांसदले मुख्यमन्त्री गुरुङविरुद्ध अविश्वासको प्रस्ताव दर्ता गरेका छन् ।

अविश्वासको प्रस्ताव दर्ता गरेपछि कांग्रेस र माओवादी केन्द्रका सांसदले समावेदन गरेर प्रदेश सभाको विशेष अधिवेशन बोलाएका थिए । 

६० सदस्यीय रहेको प्रदेश सभामा बहुमतका लागि ३१ सिटको आवश्यक पर्छ । नयाँ सत्ता समीकरणका लागि राष्टिय जनमोर्चा निर्णायक छ । जनमोर्चाका तीन सांसदले अविश्वासको प्रस्तावको पक्षमा मतदान गरे भने प्रस्ताव पारित हुने सम्भावना छ । 

प्रदेश सभामा एमाले एक्लैका २८ सदस्य छन् । सांसदहरुको कोरोना परीक्षण गर्नुपर्ने भन्दै मंगलवार एमालेले संसद बैठक अवरुद्ध गरेपछि बैठक आजको लागि सारिएको थियो । परीक्षणमा ३ जना सांसदलाई कोरोना पुष्टि भएको थियो ।

कोरोना संक्रमित सांसदलाई मतदानको अवसर दिएपनि बैठकमा बोल्न नदिइने भएको छ । २०७४ सालका माओवादी केन्द्रको समर्थनमा गुरुङ मन्त्री बनेका थिए ।