सरकारले काठमाडौं उपत्यकामा बिहीबारदेखि निषेधाज्ञा लागू गरेको भए पनि त्यसको उल्लंघन गर्नेको संख्यामा बढोत्तरी भएकोे छ ।बिहीबार बिहानैदेखि कोरोना संक्रमणको दोस्रो महामारीलाई नियन्त्रण गर्न लगाइएको निषेधाज्ञा उल्लंघन गर्ने २ हजारभन्दा बढी सडक यात्रु र २ हजार सवारीसाधनलाई कारबाहीको दायरामा ल्याइएको छ ।

निषेधाज्ञा उल्लंघन गर्ने सडक यात्रुलाई होल्डिङ सेन्टरमा राखिएको थियो भने सवारीसाधनलाई नियन्त्रणमा लिएर कारबाही प्रक्रिया अगाडि बढाएको महानगरीय ट्राफिक प्रहरी महाशाखाले जनाएको छ ।

महाशाखाका प्रवक्ता प्रहरी उपरीक्षक श्यामकृष्ण अधिकारीका अनुसार सवारीपासबिना हिँडेका १ हजार ३ सय ६० मोटरसाइकललाई नियन्त्रणमा लिइएको थियो । विभिन्न बहाना बनाएर सवारीसाधन लिएर हिँड्नेहरुलाई बिहीबार पहिलो दिन भएकाले सम्झाएर बेलुका ७ बजेपछि सवारीसाधन छोडिएको थियो भने अबदेखि भने सवारी चालकलाई समेत थुनेर कारबाही गर्ने तयारी सुरक्षा निकायले गरेको छ ।

बहाना बनाएर हिँडेका ३ सय ८५ साना सावारीसाधन र १ सय ८५ वटा ठूला सवारीसाधनलाई नियन्त्रणमा लिएको एसपी अधिकारीले जानकारी दिए । यता बिहीबार पनि राजधानी उपत्यका छोड्नेको संख्यामा कमी आएको छैन । राजधानी बाहिरबाट आएका सवारीसाधनलाई नयाँ बसपार्क प्रवेश गर्न दिइएको छ भने राजधानीबाट बाहिर जाने सवारीसाधनलाई रोक लगाएपछि सवारी चालकहरुले काठमाडौ र धादिडको सीमा क्षेत्र पीपलामोडबाट यात्रु लिएर गन्तव्यतर्फ लागेका छन् ।

राजधानीका विभिन्न ठाउँबाट हिँडेर कलंकी, थानकोट हुँदै यात्रुहरु पिपलामोड पुगेपछि त्यहाँबाट सवारीसाधनले यात्रुहरु ओसार्ने काम गरेको ट्राफिक प्रहरीले जानकारी दिएको छ । नेपाल समाचारपत्रमा खबर छ ।