नेकपा एमालेले बागमती प्रदेशबाट रिक्त राष्ट्रिय सभा निर्वाचनमा गृहमन्त्री रामबहादुर थापालाई उम्मेदवार बनाउनु पूर्व जित सुनिश्चितता भएपछि मात्र टुंगोमा पुग्ने निर्णय गरेको छ । 

विपक्षी गठबन्धनले एमाले पृष्ठभूमिका खिमलाल देवकोटालाई साझा उम्मेदवार बनाएपछि एमालेले थापालाई उम्मेदवार बनाउनु अघि थप आन्तरिक गृहकार्य गर्ने निर्णय गरेको हो । 

प्रधानमन्त्री निवास बालुवाटारमा बिहीवार बसेको एमाले स्थायी कमिटी बैठकले चुनाव जित्ने अवस्थामा मात्र थापालाई उम्मेदवार बनाउने निर्णय गरेको हो । हार्ने अबस्थामा थापालाई उम्मेदवार नबनाइने एमालेका एक स्थायी कमिटी सदस्यले जानकारी दिए । 

थापा अहिले एमालेमा तेस्रो वरियताका शीर्ष नेता हुन् । 

गृहमन्त्री थापालाई माओवादीले राष्ट्रिय सभा सदस्यबाट कार्वाही गरेपछि सोही स्थानमा जेठ ६ गते उपनिर्वाचन हुँदैछ । राष्ट्रिय सभा निर्वाचनमा प्रदेशका सांसद् तथा स्थानीय तहका प्रमुख र उपप्रमुख मतदाता हुन्छन् । प्रदेश सांसदको मत भार धेरै र स्थानीय तहका प्रमुख उपप्रमुखको कम हुन्छ । 

नेपाली कांग्रेस, माओवादी र एमालेको माधव नेपाल पक्ष एक ठाउमा उभिदा आफ्नो पक्षमा बहुमत पुग्ने उनीहरुको दावी छ । बागमती प्रदेशको योजना आयोगका उपाध्यक्ष समेत रहिसकेका देवकोटा माधव नेपाल निकट मानिन्छन् । देवकोटाले माओवादीको हँसिया हथौडा चिन्हमा साझा उम्मेदवारी दिँदैछन् । 

एमालेले पनि आफ्ना उम्मेदवारको जीत सुनिश्चित गरेर अगाडि बढ्ने निर्णय गरेको छ । बिहीवार बिहान बसेको एमाले स्थायी कमिटी बैठकले उम्मेदवारको जीत सुनिश्चित हुनेगरी छलफल अगाडि बढाउने निर्णय भएको जानकारी दिए । 

यसअघि एमालेले बादललाई नै उम्मेदवार बनाउने तयारी गरेको थियो । वैशाख १० गते बसेको महाधिवेशन आयोजक कमिटी –केन्द्र्रीय कमिटी) बैठकमा यही ब्रिफिङ भएकाे थियो । बदलिएको परिवेशमा कसलाई उम्मेदवार बनाउने भन्ने बिहीवार साँझसम्ममा निर्णय हुने एमाले स्रोतले बतायो । 

जेठ ६ गते हुने निर्वाचनका लागि भोलि उम्मेदवारको मनोनयन गर्ने निर्वाचन कार्यक्रम छ । माओवादीले राष्ट्रिय सभा सदस्यबाट हटाएपछि गृहमन्त्री थापाले पुनः मन्त्री पदको शपथ लिएका थिए । सांसद नभएको व्यक्ति ६ महिना मात्र मन्त्री बन्न पाउने व्यबस्था छ ।