एमाले महासचिव ईश्वर पोखरेलले राष्ट्रिय सभाका लागि आज भएको उपनिर्वाचनमा देखिएका हर्कतहरु अत्यन्तै निष्कृष्ट र अक्षम्य भएको बताएका छन् । यस खाले क्रियाकलापले पार्टीभित्र बनिरहेको एकताको वातावरण धुमिल बनाइदिएको उनको टिप्पणी छ।  
एमालेको माधव कुमार नेपाल समूहले बादललाई भोट नहालेपछि निर्वाचनमा विपक्षी गठबन्धनका उम्मेदवार खिमलाल देवकोटा विजयी भएका थिए । 

‘पार्टी विरूद्धमा आज  गरिएका यी अपराधपूर्ण कामले पार्टी विधान, पद्दति , प्रक्रिया, नीति , निर्णय र निर्देशनको वकालत गर्दै भइरहेका नाटक मञ्चनको मुकुण्डो पनि उदांगो भएको छ’, पोखरेलले भनेका छन्, ‘आफ्नै पार्टीका अध्यक्षलाई संसदमा विश्वासको मत दिन उपस्थित नहुने , कर्णालीको प्रदेश सभामा फ्लोर क्रस गर्ने, लुम्विनीमा त्यसैको पुनरावृत्ति गर्न खोज्ने , ‘सूर्य’ चिन्ह बाहक आफ्नै उम्मेदवारलाई हराउन विपक्षीहरुको गोटी बन्ने तर अनेक भ्रमपूर्ण र आपराधिक समाचारहरू सम्प्रेषण गर्ने  जस्ता निर्लज्ज  र अपराधपूर्ण कामहरू  कम्युनिष्ट आन्दोलन र संसदीय– लोकतान्त्रिक आन्दोलनका लागि लज्जास्पद विषय हुन् ।’
 
यद्यपि आजको निर्वाचनले एमाले विरोधी महागठबन्धनका बाबजुद पार्टी  एक्लै चुनौतीको सामना गर्न सक्षम छ भन्ने  स्पष्ट भएको पनि उनले बताएका छन् ।   विषम अबस्थामा पार्टी विभाजनका विरूद्ध दृढतापूर्वक उभिदै पार्टी र आन्दोलनको रक्षामा जुट्न आवश्यक रहेको बिहीबार राति उनले सामाजिक सञ्जालमार्फत टिप्पणी गरेका छन्।