प्रतिनिधि सभा विघटनविरुद्ध परेका रिटमाथिको सुनुवाइ मंगलवार पनि जारी रहने भएको छ । यसअघि आइतबारको इजलास मंगलवार बस्नेगरी हेर्दाहेदैमा सकिएको थियो । 

आइतवार संवैधानिक इजलासमा न्यायाधीश वमकुमार श्रेष्ठ र तेजबहादुर केसीको विषयमा प्रश्न उठेपछि  उनीहरुलाई इजलासमा राख्ने नराख्ने विषयमा बहस भएको थियो । 

अधिवक्ता गोविन्द बन्दीले नेकपा विभाजनको फैसला गर्ने न्यायाधीश संवैधानिक इजलासमा बस्न नहुने जिकिर गरेपछि यसबारे बहस भएको थियो ।

रिट निवेदकहरूको तर्फबाट बहस भएपछि महान्यायाधिवक्ता रमेश बडाल र दुई जना सहन्यायाधिवक्ताले बहस गरेका थिए । 

बडालले विपक्षीले उठाएजस्तै अमूक न्यायाधीश इजलासमा बस्न नपाउने हो भने सर्वोच्चका २० जना न्यायाधीश नै संवैधानिक इजलासमा बस्न अयोग्य हुने बताएका थिए ।

उनले कतिपय अधिवक्ताले आचारसंहिता विपरीत दुवै पक्षलाई राय दिँदै हिँडेको बताएका थिए।

सहन्यायाधिवक्ताको बहस सकिएपछि प्रधानन्यायाधीश राणाले यस विषयमा न्यायाधीशहरू ले नै विवेक प्रयोग गर्ने बताएका थिए । 

त्यसअघि बहसका क्रममा प्रधानन्यायाधीश चोलेन्द्र शमशेर जबराले न्यायाधीश छान्ने अधिकार वकिलहरूसँग नभएको जवाफ फर्काएका थिए । 

संवैधानिक इजलासमा आइतवार अधिवक्ता मिथिलेसकुमार सिंहले पनि न्यायाधीश श्रेष्ठको विषयमा प्रश्न उठाएका थिए ।

वरिष्ठ अधिवक्ता बद्रीबहादुर कार्कीले इजलासमा प्रश्न उठिसकेकाले न्यायाधीश श्रेष्ठ संवैधानिक इजलासमा नबस्दा राम्रो हुने तर्क गरेका थिए । 

यस्तै वरिष्ठ अधिवक्ता शम्भु थापाले न्यायाधीश श्रेष्ठ यो इजलासमा बस्ने कि नबस्ने भन्ने विवेकको प्रश्न भएको बताएका थिए । 

प्रतिनिधि सभा विघटनविरुद्ध सुनुवाइका लागि प्रधानन्यायाधीश जबराले दीपक कार्की, आनन्दमोहन भट्टराई, तेजबहादुर केसी र बमकुमार श्रेष्ठ सदस्य रहेको इजलास गठन गरेका थिए । अब प्रश्न उठेका न्यायाधीशको बारेमा आज टुंगो लाग्नेछ ।