प्रधानन्यायाधीश चोलेन्द्र शमशेर जबराले नेपालको संविधानको धारा १३७ले दिएको अधिकार प्रयोग गरेर नै संवैधानिक इजलास गठन गरेको बताएका छन् ।

सरकारी पक्षका वकिलहरूले इजलास गठनबारे प्रश्न उठाउँदै यसको आधार सोधेपछि प्रधानन्यायधीश जबराले यस्तो जवाफ दिएका हुन् ।

अधिवक्ता परशुराम कोइरालाको प्रश्नको जवाफमा प्रधानन्यायाधीश जबराले भने– 'संविधानको धारा १३७ हेर्नुस्, प्रधानन्यायाधीश र न्याय परिषद्को सिफारिशमा प्रधानन्यायाधीशले तोकेका अन्य ४ जना न्यायाधीश रहने भन्ने उल्लेख छ । त्यसै आधारमा रोस्टरभित्रै बाट इजलास गठन गरिएको हो ।'

यसअघि महान्यायाधिवक्ता रमेश बडाल, पूर्व महान्यायाधिवक्ता अग्नि खरेल लगायतले पनि संवैधानिक इजलास गठनको आधार सोधेका थिए ।

सबैको प्रश्नको एकमुष्ट जवाफ दिँदै प्रधानन्यायाधीश जबराले थपे- 'सबै ऐन कानूनअनुसार नै बनाएको हो ।'

यसअघि इजलास गठनका विषयमा रिट निवेदक पक्षका वकिलहरूले प्रश्न उठाएपछि प्रधानन्यायाधीश जबराले वरिष्ठतम् न्यायाधीशहरूलाई राखेर इजलास गठन गरेका छन् ।

अहिले केहीबेरका लागि चिया ब्रेक भएको छ ।