कोरोना भाइरस संक्रमण विरुद्धको खोप उपलब्ध नभएको भन्दै नेपाल पेट्रोलियम ट्यांकर चालक संघले पेट्रोलियम पदार्थको ढुवानी बन्द गरेका छन् ।

पकट–पटक सम्बन्धित निकायमा माग गर्दा खोप उपलब्ध नभएको भन्दै चालकले आइतवारदेखि ढुवानी बन्द गरेका हुन् । यसबाट निजी पम्पहरू प्रभावित भएका छन् ।

सरकारले अत्यावश्यक सेवामा बन्द, हड्ताल गर्न नपाउने गरी कानून लागू गरेको स्थितिमा ढुवानी बन्द भएको छ । 

चालक संघका अध्यक्ष ईश्वर लामाले आइतवारदेखि बरौनी, अमलेखगञ्ज क्षेत्र तथा आन्तरिक ढुवानी रोकिएको जानकारी दिए । ढुवानीकर्ताको अवरोधका कारण सोमवार पनि प्रदेशभरको आपूर्ति प्रभावित भएको आयल निगमको बागमती प्रादेशिक डिपो थानकोटले जनाएको छ । 

मंगलवारदेखि निषेधाज्ञामा केही खुकुलो भएसँगै पेट्रोलियम पदार्थको अभाव हुन सक्ने नेपाल पेट्रोलियम डिलर्स राष्ट्रिय एशोसिएशनले जनाएको छ । आइतवारदेखि थानकोट डिपोबाट पेट्रोलियम पदार्थको ढुवानी रोकिँदा मंगलवारदेखि अभाव हुनसक्ने एशोसिएशनका अध्यक्ष लिलेन्द्र प्रधानले जानकारी दिए ।

उनका अनुसार काठमाडौं उपत्यकाका ३ जिल्ला (काठमाडौं, ललितपुर र भक्तपुर) मा १७६ वटा निजी पेट्रोल पम्प सञ्चालनमा छन् । 

सीसीएमसीसँग खोप माग

उद्योग, वाणिज्य तथा आपूर्ति मन्त्रालयले अत्यावश्यक वस्तु तथा सेवा प्रवाह गर्ने व्यवसायीलाई खोप उपलब्ध गराउन माग गरेको छ । कोभिड संकट व्यवस्थापन केन्द्रलाई पत्र लेख्दै उद्योग मन्त्रालयले पेट्रोल तथा ग्यास व्यवसायीलाई लगाउन १ लाख ५७ हजार ५९६ डोज खोप उपलब्ध गराउन माग गरेको छ । 

नेपाल पेट्रोलियम डिलर्स राष्ट्रिय महासंघलाई १० हजार ३४६ डोज, नेपाल ट्रक यातायात व्यवसायी महासंघलाई १ लाख ४० हजार डोज र ग्यास बिक्रेता महासंघलाई ४ हजार ६०० डोज खोप उपलब्ध गराउन मन्त्रालयले माग गरेको छ । 

नेपाल पेट्रोलियम ट्यांकर चालक संघ थानकोटलाई १५ हजार, नेपाल आयल निगमलाई १ हजार डोज र साल्ट ट्रेडिङ कर्पोरेसनलाई १५० डोज खोप उपलब्ध गराउन माग गर्दै मन्त्रालयले सोमवार कोभिड संकट व्यवस्थापन केन्द्रलाई पत्र लेखेको छ ।