भारतीय सिनेमाका लिजेन्ड अभिनेता दिलिपकुमारको निधन भएको छ । यो खबरले चलचित्र क्षेत्र शोकमा छ । 

उनको निधनप्रति कलाकार, समर्थकहरूले सामाजिक सञ्जालमार्फत श्रद्धाञ्जली व्यक्त गरिरहेका छन् ।  

यसैक्रममा अमिताभ बच्चनले पनि दिलिपकुमारको निधनमा श्रद्धासुमन व्यक्त गरेका छन् । 

उनले ट्वीट गरेका छन्– एउटा संस्थाले नै छाडेर गयो । हिन्दी सिनेमाको जब कुनै बेला इतिहास लेखिने छ, यो सधैँ दिलिपकुमारभन्दा पहिले र दिलिपकुमार पछि भनेर भनिने छ। उनको आत्मालाई शान्ति र परिवारप्रति यो दःखद् क्षणमा शक्ति प्रदान होस् भन्ने प्रार्थना गर्दछु । एकदमै दुःखी छु । 

उनले अर्को ट्वीटमा लेखेका छन्– फर्केर नआउने गरेर एउटा युगमा नै पर्दा लाग्यो ।

दिलिपकुमारसँग अमिताभले एउटा मात्रै चलचित्रमा अभिनय गरेका थिए । यी दुई महारथीलाई सँगै खेलाउने भूमिका ‘शोले’ जस्ता कालजयी चलचित्र दिएका निर्देशक रमेश सिप्पीले गरेका थिए । 

सन् १९८२ मा रिलिज भएको ‘शक्ति’मा उनीहरू सँगै देखिएका थिए । 

चलचित्रमा दिलिपकुमारले इमान्दार प्रहरी अधिकृतको भूमिका निभाएका थिए, जुन कुरा उनको छोराले बुझ्न सक्दैन । छोराको भूमिका अमिताभले गरेका थिए । यसमा अमिताभ ग्यांग्स्टरको भूमिकामा देखिएका थिए ।