मोदी सरकारमा ३ किसिमका मन्त्री, कति खान्छन् तलबभत्ता ?

भारतीय प्रधानमन्त्री नरेन्द्र मोदीले बुधवार मन्त्रिपरिषद् पुनर्गठन गरेका छन् । 

भारत सरकारमा ३ किसिमका मन्त्री हुने गरेका छन्, जसमा क्याबिनेट मन्त्री, राज्यमन्त्री स्वतन्त्र प्रभार र राज्यमन्त्री रहेका भारतीय सञ्चारमाध्यमले जनाएका छन् ।

पहिलो नम्बरको क्याबिनेट मन्त्री मन्त्रिपरिषद् बैठकमा सहभागी भएर सरकारका सबै निर्णयमा भाग लिन पाउँछन् । सँगसँगै कुनै १ वा सोभन्दा बढी मन्त्रालयको नेतृत्व लिएर काम गर्छन् ।

दोस्रो नम्बरमा पर्ने राज्यमन्त्री स्वतन्त्र प्रभारले मन्त्रालयको काम त गर्छन् तर सधैं मन्त्रिपरिषद्मा सहभागी हुँदैनन् । मन्त्रालयसँग सम्बन्धित काम हुँदा मात्रै मन्त्रिपरिषद् बैठकमा सहभागी हुन्छन् ।

तेस्रो नम्बरमा पर्ने राज्यमन्त्री मन्त्रिपरिषद् बैठकमा सहभागी हुन पाउँदैनन् । मन्त्रालयभित्रै कुनै खास जिम्मेवारी लिएर मन्त्री मातहत रहेर काम गर्छन् ।

भारतमा क्याबिनेट मन्त्रीको तलब (भारु) मासिक १ लाख, निर्वाचन क्षेत्र भत्ता ७० हजार रुपैयाँ, कार्यालय भत्ता ६० हजार रुपैयाँ, सत्कार भत्ता २ हजार रुपैयाँ हुने गरेको जनाइएको छ ।

यसबाहेक यात्रा भत्ता, यात्रा सुविधा, रेल यात्रा सुविधा, आवास, टेलिफोन लगायत सुविधा मिल्ने गरेको छ ।