अफगानिस्तानबाट अमेरिका हटेसँगै संसारभरि तालिबान शासनका विषयमा चिन्ता व्यक्त भइरहेको छ । 

तालिबान, पाकिस्तान र चीन मिलेर भारतको जम्मु कश्मीरमा ठूलो संकट निम्त्याउने आशंका भारतका सुरक्षा निकायहरूले गरेका छन् । 

यसैबीच अमेरिकाका राष्ट्रपति जो बाइडनले अफगानिस्तानबाट सबै सैनिक फिर्ता बोलाएर चीन र रुसबाट आउने जोखिममा पूरा ध्यान केन्द्रित गर्ने बताएका छन् । अगस्ट ३१ सम्ममा सबै अमेरिकी सैनिक घर फर्केपछि अब अमेरिकाको ध्यान महाशक्ति प्रतिस्पर्धामा केन्द्रित हुनेछ । 

सन् २०१३ को आरम्भमा अमेरिकाले चीन सी चिनपिङको नेतृत्वमा द्रुत गतिमा सैन्य शक्ति बढाइरहेको कुरा थाहा पायो । चीनले दक्षिण चीन सागर, जिबुती र मध्य एसियाका कतिपय स्थानमा सैन्य अड्डा धमाधम बनाइरहेको छ ।

सन् २०१४ मा रुसले पनि युक्रेनको क्राइमिया हात पारेर पूर्वी युक्रेनमा पृथक्तावादीहरूलाई सहायता दिन थालेको छ । रुसले अमेरिकी निर्वाचनलाई प्रभावित पार्ने प्रयास पनि गरेको बताइएको छ । 

अहिले चीन र अमेरिका ताइवानको विषयमा आमनेसामनेको स्थितिमा छन् । 

अनि अन्तरिक्ष र साइबर स्पेसमा पनि अमेरिकाको कडा प्रतिस्पर्धा चीन र रुससँग छ । 

अमेरिकाले जलसेनालाई बलियो बनाउन थालेको छ । लामो दूरीमा मार हान्ने बमवर्षक विमान पनि उसले बनाइरहेको छ र विनाशक पनडुब्बीहरूको संख्या पनि बढाइरहेको छ ।