नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्ता गठबन्धन भत्काउन अनेक षड्यन्त्र भइरहेको बताएका छन् । 

शेरबहादुर देउवा नेतृत्वको सरकारलाई झण्डै दुई तिहाइ बहुमत नजिक पु¥याएपछि प्रतिक्रियावादीहरूले यसलाई नसोचेको कुरा भएको ठान्दै सत्तारुढ दलबीचको गठबन्धनलाई अझै पनि भत्काउने षड्यन्त्र भइरहेको प्रचण्डले बताएका हुन् । 

नेपाल कम्युनिष्ट पार्टीका संस्थापक नेता नरबहादुर कर्माचार्यको ८ औं स्मृति दिवसको अवसर पारेर शनिवार काठमाडौंमा आयोजित कार्यक्रममा बोल्दैै उनले प्रतिगमनविरुद्धको संघर्षमा बनेको गठबन्धनलाई बचाउने प्रयास जारी रहे पनि अर्कोतिरबाट त्यसलाई टुटाउने प्रयास भइरहेको उल्लेख गरे । 

‘सत्ता गठबन्धनलाई भत्काउने प्रयास अझै पनि जारी छ । नेताहरूबीच कतै छिद्र  छ कि ? कांग्रेस र कम्युनिष्ट भँडाउन सकिने हो कि ? एमालेभित्र चलिराखेको छ नि फरमानको फरमान । एमसीसी अगाडि सारेर हुन्छ कि ? आईपीएस अगाडि सारेर हुन्छ कि ? यस्ता विषयलाई अघि सारेर सत्ता गठबन्धनलाई भत्काउन अनेक खालका कसरत भइरहेको बुझ्न जरुरी छ,’ उनले भने ।  

अध्यक्ष दाहालले संसद् विघटनविरुद्ध एकैठाउँ उभिएका एमाले नेता भीम रावलको राजीनामा प्रकरण पनि सत्ता गठबन्धनलाई भत्काउने षड्यन्त्र भएको जिकिर गरे । 

‘संसद् विघटनविरुद्धको गठबन्धनमा राम्रो भूमिका खेलेका, बडो स्पिरिटका साथ काम गरेका साथीहरू पनि ढले,’ उनले भने, ‘त्यो त्यत्तिकै ढलेको होइन । त्यहाँभित्र गम्भीर षड्यन्त्र थिए । त्यति गरेर पनि गठबन्धन टुटाउन नसकेपछि देउवा नेतृत्वको सरकारलाई बहुमत आउन नदिन ठूलो कसरत भयो ।’

प्रचण्डले एमाले अध्यक्ष केपी शर्मा ओली इतिहासमा नराम्रोसँग पछारिए पनि कमजोर ठानिहाल्ने अवस्था नरहेको बताए । 

उनले सत्ता गठबन्धनमाथि जनताको पक्षमा दिनदिनै केही काम गरेर देखाउने चुनौती रहेको उल्लेख गर्दै मन्त्रीहरूलाई लापरबाही गर्ने कुनै छुट नभएको स्पष्ट पारे । ‘यो बाँकी अवधि राष्ट्र र जनताको पक्षमा समर्पित गर्नु पर्नेछ,’ उनले भने, ‘हुुन त सरकारले जनताको जीवन सुरक्षाका लागि कोरोना खोपलाई प्राथमिकता दिएर राम्रो कामको शुरूवात गरेको छ । तर, अब यो राष्ट्रलाई नै क्याप्चर गरेर निरंकुशता लाद्न ओली नेतृत्वको सरकारले गरेको सेटिङलाई कानून र संविधानसम्मत ढंगले परास्त गर्दै अघि बढ्नुपर्ने हुन्छ ।’