अफगानिस्तानमा युद्धरत तालिवान विद्रोहीले काबुलस्थित राष्ट्रपति भवनमा कब्जा जमाएका छन् । आइतबार राति प्राप्त समाचारमा असरफ गानीले देश छाडेसँगै तालिवानले राष्ट्रपति भवन  कब्जा गरेको जनाइएको छ ।

गानीले देश छाडेपनि केही घन्टासम्म राष्ट्रपति भवनमा सरकारी सुरक्षा कायम थियो । पछि तालिवान विद्रोही पुगेर भवन खाली गर्न लगाइ कब्जा जमाएको समाचार एजेन्सी रोएटर्सलाई उदृत गर्दै बीबीसीले जनाएको छ ।
स्थानीय पत्रकार विलाल सरवरीले तालिवानसँग वार्तामा संलग्न दुई अधिकारीलाई उदृत गर्दै गानी सत्ता हस्तान्तरण गर्न राजी भएको बताएका छन् ।

सम्झौताअनुसार सत्ता हस्तान्तरण कार्यक्रम राष्ट्रपति भवनमा आयोजना गर्ने तय भएको थियो भने जुन समारोहमा गानी पनि सहभागी हुन राजी भएका थिए। तर उनी एकाएक सहयोगीसँगै विदेश भागेको समाचारमा जनाइएको छ ।

कब्जा गर्नुअघि तालिवानले त्यहाँका सुरक्षा अधिकारी र कर्मचारीलाई भवन खाली गरिदिन भनेको थियो । सरकारी गानी समर्थित अधिकारीले भने यसबारे औपचारिक रुपमा पुष्टि गरिसकेका छैनन् ।