रोजगारीका लागि अफगानिस्तान पुगेको नेपालीलाई त्यहाँका रोजगारदाता कम्पनीले उद्धार गरिरहेको नेपालस्थित वैदेशिक रोजगार व्यवसायीहरूले बताएका छन् ।

अफगानिस्तानमा त्यहाँको विद्रोही संगठन तालिबानले सत्ता कब्जा गरेपछि त्रासदीपूर्ण अवस्था सिर्जना भएको छ ।

अफगानिस्तानमा रहेका विदेशी नागरिकहरूलाई सम्बन्धित देशहरूले धमाधम फिर्ता लगिरहेका छन् । 

नेपालबाट विशेष गरी विदेशी मिसनमा सुरक्षा गार्डको रूपमा काम गर्न नेपालीहरू अफगानिस्तान जाने गरेका थिए । 

नेपालबाट अहिलेसम्म श्रम स्वीकृति लिएर करीब चार हजार नेपाली अफगानिस्तान गएको नेपाल वैदेशिक रोजगार व्यवसायी संघका अध्यक्ष सुजित श्रेष्ठले बताए । 

वैधानिक रूपमा भन्दा पनि भारत र पाकिस्तानको बाटो भएर अवैधानिकरूपमा धेरै नेपालीहरू रोजगारीका लागि अफगानिस्तान पुगेका छन् । 

अफगानिस्तानमा करीब १४ देखि १५ हजार नेपाली कामदार रहेको अनौपचारिक तथ्यांक रहेको श्रेष्ठले बताए । यसमध्ये धेरैजसो तेस्रो मुलुक भएर अफगानिस्तान पुगेका हुन् ।

श्रम स्वीकृति लिएर अफगानिस्तान गएका नेपालीहरू नेपालस्थित वैदेशिक रोजगार कम्पनीहरूसँग सम्पर्कमा रहेको र अहिले उनीहरूलाई रोजगार दिने संस्थाले उद्धार गरेर विभिन्न देश पुर्‍याइरहेको श्रेष्ठले बताए ।

‘हामी नेपाली श्रमिकसँग सम्पर्कमा छौँ । उनीहरूलाई रोजगार दिने संस्थाले नै अफगानिस्तानबाट उद्धार गरेर विभिन्न देश पुर्‍याएको छ । ती कम्पनीले नै उनीहरूलाई नेपाल पठाइदिन्छ,’ श्रेष्ठले भने, ‘अहिले कसैलाई लण्डन पुर्‍याइएको छ, कोही दिल्ली, टर्की, दुबई, दोहालगायत स्थानमा सुरक्षित रूपमा पुर्‍याइएका छन् ।’

तर, तीनदेखि चार सय जना नेपाली भने अफगानिस्तानमा जोखिमपूर्ण अवस्थामा रहेको जानकारी आफूले पाएको श्रेष्ठले बताए । 

‘कतिपयलाई भने कम्पनीले रोजगारीबाट हटाइदिएको छ । श्रम स्वीकृति नभएको कारण पनि उनीहरू समस्यामा छन् । कतिपयको त पासपोर्ट नै नभएको अवस्थामा पनि छन्,’ श्रेष्ठले भने । 

अप्ठ्यारोमा रहेका नेपालीहरूका बारेमा परराष्ट्र मन्त्रालय र नजिकका देशका राजदूतावासमा पनि जानकारी गराएको वैदेशिक रोजगार व्यवसायी संघका अध्यक्ष श्रेष्ठले बताए । 

नेपालबाट श्रमिक लगेर रोजगारी दिलाउने सेक्युरिटी कम्पनी फोर्सले करीब १२ जना नेपालीलाई विमान चार्टर्ड गरेरै उद्धार गरेको श्रेष्ठले बताए ।