अमेरिकी सेना अफगानिस्तान छोडेर गएपछि तालिबानलाई देशमा स्थिरता कायम गर्ने चुनौती आइलागेको छ । 

यस्तो स्थितिमा पाकिस्तानले आफ्ना शीर्ष सुरक्षा तथा गुप्तचर अधिकारीलाई अफगानिस्तान पठाएर तालिबान सेनाको निर्माणमा सहयोग गर्ने भएको छ । 

पाकिस्तानलाई सबभन्दा बढी जोखिम तहरीक–ए–तालिबान नामक आतंकवादी संगठनबाट छ । त्यस संगठनका लडाकूले पाकिस्तानी सैनिकहरूको ज्यान लिइरहेका छन् । 

उनीहरू अफगानिस्तानबाट पाकिस्तान आउने अनि सैनिक मारेर उतै भाग्ने काम गरिरहेका छन् । विगत दुई दशकमा हजारौं पाकिस्तानी सेना यी आक्रमणमा मारिएका छन् । 

इमरान खानको सरकारलाई अमेरिकाको अत्याधुनिक हतियार पाएका टीटीपीका लडाकूहरू पाकिस्तान सीमामा भीषण आक्रमण गर्ने डर छ । पाकिस्तान सरकारका एक सूत्रले विदेशी सञ्चारमाध्यमलाई बताए, ‘तालिबानलाई आफ्नो सेना संगठित गर्नका लागि हामी सहायता गरिरहेका छौं । त्यसपछि उनीहरू आफ्नो क्षेत्रमा नियन्त्रण कायम गर्न सक्छन् ।’

तालिबान सेनालाई संगठित गर्नका लागि पाकिस्तानले आफ्ना शीर्ष अधिकारी पठाउन लागेको संकेत यसबाट पाइएको छ ।