माधवकुमार नेपाल नेतृत्वको नेकपा (एकीकृत समाजवादी) सुदूरपश्चिम प्रदेश सभाको सबैभन्दा ठूलो दल बनेको छ ।

ओलीपक्षीय भनेर चिनिएकी प्रदेश सभा सदस्य माया तामाङले समेत नेकपा (एस)का पक्षमा सनाखत गरेपछि सांसद संख्या १४ पुगेको हो ।

१४ सांसद नयाँ पार्टीको पक्षमा खुलेपछि नेकपा एमाले भने ११ सांसदसहित चौथो दलका रूपमा खुम्चिन पुगेको छ ।

शुरूमा भीम रावल नयाँ पार्टीमा नजाँदा सुदूरपश्चिममा एमालेलाई खासै क्षति नहुने अनुमान गरिएको थियो ।

तर भीम रावलले सुदूरपश्चिममा पार्टीमा पहिरो जानबाट रोक्न सकेनन् ।

माधव नेपालको पक्षमा रहेर मुख्यमन्त्री त्रिलोचन भट्टलाई विश्वासको मत दिएका १७ मध्ये १३ जनाले नयाँ पार्टीका पक्षमा सनाखत गरेका छन् ।

त्यतिबेला भट्टलाई विश्वासको मत नदिएकी तामाङले पनि नेकपा एस रोजेपछि एमालेलाई थप क्षति पुगेको हो ।

पहिले माधव नेपाल पक्ष भनेर चिनिएका ४ सांसदले मात्र नयाँ पार्टी रोजेका छैनन् ।