सत्ता गठबन्धनभित्र संघीय संसद्को नवौं अधिवेशनमा पेस हुने अध्यादेशमा भने समान धारणा बनाउने सहमति भएको छ ।प्रधानमन्त्री तथा मन्त्रिपरिषद्को कार्यालय सिंहदरबारमा बुधबार संसद् बैठक सुरु हुनुअघि बसेको गठबन्धन आबद्ध दलका शीर्ष नेताहरूको संयुक्त बैठकले अध्यादेशमा समान धारणा बनाउने सहमति गरेका हुन् ।

गठबन्धनमा भएको सहमतिअनुसार नै सरकारले बुधबारको संसद् बैठकमा राजनीतिक दलसम्बन्धी अध्यादेश भने पेस गरेको छ । गठबन्धनको बैठकमा सहभागी कांग्रेस महामन्त्री पूर्णबहादुर खड्काले मन्त्रीहरूसँग संसद्मा पेस हुने विषय र अन्य विषयबारे जानकारी मागिएको तथा अध्यादेशमा समान धारणा बनाउने सहमति भएको बताए ।

‘गठबन्धन बैठकमा संसद्सँग सम्बन्धित विषयमा छलफल भयो, संसद्मा पेस हुने अध्यादेश र अन्य विषयबारे सम्बन्धित मन्त्रीहरूले ब्रिफिङ गर्नुभयो, अध्यादेशमा समान धारणा बनाउने सहमति भएको छ,’ खड्काले भने । राजधानी दैनिकमा खबर छ ।