तत्कालीन घाँसीकुवा गाविस सचिवसहित ७ जनाविरुद्ध भ्रष्टाचार मुद्दा

तनहुँको साविक घाँसीकुवा गाविसका तत्कालीन सचिव रामराज न्यौपानेसहित सातजनाविरुद्ध भ्रष्टाचार मुद्दा दायर गरिएको छ । 

अख्तियार दुरुपयोग अनुसन्धान आयोगले भ्रष्टाचार गरेको पुष्टि भएकाले काठमाडौं विशेष अदालत आरोप पत्र दायर गरेको जनाएको छ । 

अख्तियारले न्यौपानेसहित तत्कालीन जिल्ला प्राविधिक कार्यालय तनहुँका इन्जिनियरद्वय शुकदेव अधिकारी र तीर्थराज ढुंगाना, तत्कालीन जिल्ला विकास समिति तनहुँका योजना अधिकृत गणेश घिमिरे, तत्कालीन अधिकृत ऋषिभक्त वाग्ले र साविक घाँसीकुवा गाविसका रजिष्ट्रार लेखापरीक्षक नरहरि पण्डित र श्रीभद्र खनालविरुद्ध आरोप पत्र दाय गरेको हो । 

न्यौपानेविरुद्ध एक लाख ४७ लाख ३६४ रूपैयाँ ७५ पैसा, अधिकारीविरुद्ध ६३ हजार ७५०,  घिमिरेविरुद्ध ६३ हजार ७५०, ढुंगानाविरुद्ध ७२ हजार २५० र वाग्लेविरुद्ध ७२ हजार २५० रुपैयाँ बिगो कायम गर्दै आरोपपत्र दायर गरिएको छ । 

उनीहरूविरुद्ध घाँसीकुवा गाविसमा दशैँ खर्च, परिषद् तयारी खर्च भनेर एक/एक महिनाको तलब थप लिएको, परिषद्को निर्णयविना आर्थिक सहायता दिने गरेको, कन्सल्ट्यान्ट नियुक्तिपछि गरी पहिल्यैदेखिको सम्झौता बनाई रकम भुक्तानी गरेको, जिन्सी खाता नरहेको, विभिन्न फोटोकपी बिल राखेर खर्च लेख्ने गरेको, योजनाको इस्टिमेट र कार्य सम्पन्न प्रतिवेदनमा जिम्मेवार व्यक्तिको हस्ताक्षर नभएको जस्ता आरोपहरू पुष्टि भएपछि आरोपपत्र दायर गरेको अख्तियारले जनाएको छ ।