चीनसँग प्रतिस्पर्धाका लागि संसारभरि संयुक्त युद्धाभ्यास गर्दै भारत

भारतले बदलिँदो विश्व परिस्थितिलाई झ्यालबाट हेरेर बस्नुभन्दा मैदानमा आएर खेल्ने रणनीति बनाइरहेको देखिन्छ । 

संसारका विभिन्न स्थानमा युद्धाभ्यास गरेर भारतले यस्तो संकेत दिएको हो । अभूतपूर्व संख्यामा द्विपक्षीय तथा बहुपक्षीय सैन्य अभ्यासमा भारत सहभागी भइरहेको छ । 

भारतका सुरक्षा अधिकारीहरू रक्षा कूटनीति, सामरिक संकेत, पारस्परिकता लगायतका शब्दावली बाक्लै प्रयोग गरिरहेका छन् । 

भारतका एक वरिष्ठ सैन्य अधिकारीले द टाइम्स अफ इन्डियालाई बताए, ‘युद्धाभ्यासहरूबाट युद्धकौशल बढ्नेछ, वैश्विक स्तरमा सर्वोत्तम प्रणालीको ज्ञान हासिल हुनेछ । विभिन्न देशसँग सैन्य र सामरिक सहयोग, विश्वास बहाली तथा पारस्परिक निर्भरतालाई पनि यसबाट बल पुग्नेछ ।’

भारतले पोहोर साल अगस्ट महिनामा पश्चिमी प्रशान्त महासागरमा मालाबार युद्धाभ्यास गरेको थियो । हिन्द प्रशान्त क्षेत्रमा चीनको बलप्रयोगविरुद्ध अप्रिल महिनामा बंगालको खाडीमा क्वाड प्लस फ्रान्सको संयुक्त युद्धाभ्यास भएको थियो । 

यस वर्षका बाँकी महिनामा पनि भारतले अनेकौं युद्धाभ्यासमा भाग लिने भएको छ । अक्टोबरमा बंगालको खाडीमा क्वाड प्लस यूकेको जलसैन्य अभ्यास हुनेछ । त्यसपछि बेलायती सेनाका तीनै अंग अर्थात् स्थलसेना, जलसेना र वायुसेनाका साथ युद्धाभ्यास पनि गरिनेछ । 

२४ देखि २७ अक्टोबरसम्म गरिने यी युद्धाभ्यासमा ६५ हजार टन तौल भएको एयरक्राफ्ट क्यारियर एचएमएस क्वीन एलिजाबेथ र पाँचौं पुस्ताको हलुका लडाकू विमान एफ–३५बी हुनेछन् । 

भारतले अहिलेसम्म अमेरिका र रुससँग मात्र सेनाका तीनै अंगको संयुक्त युद्धाभ्यास गरेको छ । 

भारतीय सेनाले हालैका दिनमा रुसमा इन्द्र र काजाकस्तानमा काजिन्द युद्धाभ्यास गरेको छ । अहिले रुमिा १७ देशहरूको जापाड अभ्यास चलिरहेको छ र त्यसमा भारतले दुई हजार सैनिक पठाएको छ । 

अनि नोभेम्बर महिनामा नेपालसँग सूर्य किरण, श्रीलंकासँग मित्रशत्तिल, बेलायतसँग अजेय योद्धा, अमेरिकासँग युद्ध अभ्यास र फ्रान्ससँग शक्ति नामक युद्धाभ्यास पनि भारतले गर्ने भएको छ ।