नेपाल बार एशोसिएसन र सर्वोच्च बार एशोसिएसनले एमिकस क्युरी नपठाउँदा संवैधानिक इजलासको विवादसम्बन्धी पेशी तोकिएको भए पनि कुनै सुनुवाइ हुन सकेन । 

शुक्रवार न्यायाधीशद्वय प्रकाशकुमार ढुंगाना र मनोजकुमार शर्माको संयुक्त इजलास तोकिएको थियो । तर सुनुवाइको लागि यसअघि हरिप्रसाद फुयालको इजलासले दुवै बारबाट दुई/दुई जना वरिष्ठ अधिवक्तासहित चार जना एमिकस क्युरीको रुपमा पठाउन आदेश गरेको थियो । 

उक्त आदेशपछि नेपाल बार एशोसिएसनले पूर्व अध्यक्ष तथा वरिष्ठ अधिवक्ता शेरबहादुर केसी र वर्तमान अध्यक्ष तथा वरिष्ठ अधिवक्ता चण्डेश्वर श्रेष्ठ, सर्वोच्च बारले वर्तमान अध्यक्ष तथा वरिष्ठ अधिवक्ता पूर्णमान शाक्य र वरिष्ठ अधिवक्ता रविनारायण खनाललाई एमिकस क्युरी पठाउने निर्णयसमेत गरेको थियो ।  

नेपाल बार एशोसिएसनका महासचिव लीलामणि पौडेल निवेदकको रिट निवेदन, न्यायाधीश फुयालको इजलासबाट आएको आदेश र विपक्षीहरूले दिएको लिखित जवाफ नै बारमा सर्वोच्च अदालतले हालसम्म नपठाएकोले एमिकस क्युरी नपठाइएको बताउँछन्। 

'हामीसँग निवेदन, आदेश र लिखित जवाफ नै नभएपछि के को आधारमा बहस गर्न एमिकस क्युरी पठाउने ?,' पौडेलले लोकान्तरसँग भने,'आज पेशी तोकिएको छ भन्ने सूचना मात्र सर्वोच्च बारकोमा आएको रहेछ, त्यही सूचनाको भरमा मात्र एमिकस क्युरी पठाउन त सकिन्न नि ।'

अधिवक्ता गणेश रेग्मी निवेदक रहेको उक्त मुद्दा अब अर्को दिनको लागि पेशी तोकिनेछ ।