भारत र चीनका सैनिकहरूबीच पोहोर साल भिडन्त भएपछि भारतले सीमाक्षेत्रमा सैन्य गतिविधि बढाएको छ । 

अरुणाचल प्रदेशमा यी दुई देशबीचको तनाव चर्किने लक्षण देखिएको छ । 

तिब्बतसँग जोडिएको अरुणाचल प्रदेशलाई चीनले दक्षिण तिब्बत भन्ने गरेको छ । सन् १९६२ मा भारत र चीनबीच युद्ध हुँदा चीनले केही समयका लागि अरुणाचलमा कब्जा गरेको थियो ।

अहिले दुवै देशका सैनिकले अर्काको नियन्त्रणमा रहेको क्षेत्रमा गश्ती गर्ने गरेका छन् । चीनले सीमा नजिक स्थायी संरचना बनाएको आरोप भारतले लगाएको छ । 

‘चिनियाँ क्षेत्रमा पूर्वाधार विकास गरिएको हामीले देखेका छौं,’ भारतीय सेनाका लेफ्टिनेन्ट जनरल मनोज पाण्डेले पत्रकारहरूलाई बताए । 

नयाँ दिल्लीले अरुणाचल प्रदेशमा सैन्य गतिविधि बढाएको छ । त्यसक्रममा उसले क्रुज क्षेप्यास्त्र, हावित्जर, अमेरिकामा बनेको चिनूक हेलिकप्टर र इजरायलमा बनेको ड्रोन तैनाथ गरेको छ । 

पोहोर सालको भिडन्तपछि भारतीय सेनाले सीमामा उपस्थिति बढाउनुपर्ने आवश्यकता अनुभव गरेको थियो । चीनसँग सीमाविवादका विषयमा गरेको वार्ता लगातार विफल हुँदै जाँदा सैन्य गतिविधि बढिरहेको छ । 

रणनीतिक रूपमा महत्त्वपूर्ण तवाङको तापक्रम जाडो महिनामा शून्यभन्दा तल झर्ने गरेको छ ।

सेनाका इन्जिनीयरहरूले समुद्र सतहभन्दा चार हजार मिटरमाथि विशाल सुरुङ बनाइरहेका छन् । अर्को वर्ष आवागमन शुरू गरिने उक्त सुरुङले भारतीय सैनिकहरूलाई दुर्गम स्थानमा पहुँच सहज बनाउनेछ ।

लद्दाखमा पनि यस्तै किसिमको परियोजना चलिरहेको छ । जोजिला पासमुनि बनेको सुरुङले सैनिकहरूलाई तीव्र गतिमा सीमामा पुग्न सहायता गर्नेछ ।