जबराले आज पनि तोके सबैखाले मुद्दाको पेशी, आफ्ना लागि एकल इजलास

प्रधानन्यायाधीश चोलेन्द्र शमशेर जबराले बिहीवार पनि सबैखाले मुद्दाहरूको नियमित पेशी तोकेका छन् ।

सर्वोच्चका १८ न्यायाधीशले बन्दी प्रत्यक्षीकरणबाहेक अन्य मुद्दा हेर्न अस्वीकार गर्दै आएको अवस्थामा जबराले मंगलवार जस्तै सबैखाले मुद्दाको पेशी तोकेका हुन् ।

न्यायाधीशहरूले आफूसँग बेञ्च शेयर नगर्ने सन्देश पाएका जबराले आफ्ना लागि एकल इजलास गठन गरेका छन् ।

न्यायाधीशहरू दीपक कुमार कार्की र प्रकाशमान सिंह राउतको संयुक्त इजलास, मीरा खड्का र तेज बहादुर केसीको संयुक्त इजलास, हरिकृष्ण कार्की ,आनन्द मोहन भट्टराई र सुष्मलता माथेमाको पूर्ण इजलास तोकिएको छ।

त्यसैगरी विश्वम्भर प्रसाद श्रेष्ठ र नहकुल सुवेदीको संयुक्त इजलास, विश्वम्भर प्रसाद श्रेष्ठको एकल इजलास, बमकुमार श्रेष्ठ र कुमार रेग्मीको संयुक्त इजलास, प्रकाश कुमार ढुंगानाको एकल इजलास, कुमार चुडालको एकल इजलास, नहकुल सुवेदीको एकल इजलास पनि तोकिएको छ।

बिहीवार प्रधानन्यायाधीश जबराले आफ्नो इजलासमा जबरजस्ती करणी, कर्तव्य ज्यान, ज्यान मार्ने उद्योग, लागू औषध र कालो बजारी तथा केही अन्य सामाजिक अपराधसम्बन्धी कसूरका मुद्दाहरू पेशी तोकेका छन् ।