नेपाल बार एसोसिएसनले प्रधानन्यायाधीश चोलेन्द्र शमशेर जबराको राजीनामा माग गर्दै उनलाई अदालत प्रवेशमा रोक लगाउने गरी अवरोधको तयारी गरेपछि सर्वोच्च अदालतमा सुरक्षा व्यवस्था कडा बनाइएको छ । 

सर्वोच्च अदालत प्रवेश गर्ने दुवै गेटमा ठूलो संख्यामा प्रहरी परिचालन गरिएको छ भने बारबाट सर्वोच्च छिर्ने गेट बन्द गरिएको छ । कानून व्यवसायीहरूलाई सर्वोच्चतर्फ जान नदिन गेट बन्द गरिएको हो ।

बारले बिहीवार गरेको कार्यक्रममा प्रहरी हस्तक्षेप भएपछि आज राणालाई अदालत प्रवेशमा अवरोध गर्ने घोषणा सर्वोच्च बारले गरेको थियो ।

महान्यायाधिवक्ता कार्यालय नजिकको गेट भने अन्य समयमा बन्द हुँदै आएको थियो । अवरोध भएमा सो गेटबाट राणा प्रवेश गर्न सक्ने आंकलन गरिएको छ ।

सर्वोच्च अदालतमा बिहानैदेखि बाक्लो संख्यामा सुरक्षाकर्मी परिचालन गरिएको छ । हिजो सर्वोच्च अदालत परिसरमा सुरक्षाकर्मी र वकिलबीच ठेलमठेल भएको थियो । 

अदालतमा भइरहेको भ्रष्टाचार र विकृतिको संरक्षण प्रधानन्यायाधीशले गरेको भन्दै बारले उनलाई पदच्युत गर्न माग गरेको छ ।

तस्वीर : अजय अनुरागी / विश्वास खनाल