राणाको राजीनामा नआएसम्म आन्दोलन रोकिन्न, विवादित फैसला छानबिन गर्छौं– बार अध्यक्ष श्रेष्ठ

नेपाल बार एसोसिएसनका अध्यक्ष चण्डेश्वर श्रेष्ठले प्रधानन्यायाधीश चोलेन्द्र शमशेर जबराले राजीनामा नदिएसम्म आन्दोलन नरोकिने बताएका छन् । 

राजीनामाका लागि आफूहरूले शुक्रवारसम्मको समयसीमा दिएको भन्दै उनले राजीनामा नगरे अझै सशक्त आन्दोलन गर्ने चेतावनी दिए ।

जबराले गरेका विवादित फैसला संकलन गरेर त्यसको छानबिन हुने उनको भनाइ छ । साथै उनले जबराको सम्पत्ति समेत छानबिन हुने बताए ।

अध्यक्ष श्रेष्ठले आँखामा छारो हाल्न मात्र वार्ताको प्रयास गरिएको जिकिर गरे ।

उनले आन्दोलन शुरू भएयता प्रहरी हस्तक्षेपमा ८ जना वकिल घाइते भइसकेको भन्दै हस्तक्षेप नगर्न प्रहरी प्रशासनलाई अपिल गरे ।

प्रधानन्यायाधीश जबराको राजीनामा माग्दै बारले झण्डै ३ सातादेखि विरोध प्रदर्शन गर्दै आएको छ । बारले केही दिनयता सर्वोच्च अदालतको मुख्यद्वारमा धर्ना दिँदै आएको छ ।