पदाधिकारीका आकांक्षी धेरै भएपछि नेकपा एमालेले विधान संशोधन मार्फत केन्द्रीय सदस्य र पदाधिकारीको संख्या बढाउने गृहकार्य थालेको छ ।

चितवनमा शुक्रवार शुरू महाधिवेशनमा पदाधिकारीका आकांक्षी धेरै भएपछि पदाधिकारीको संख्या बढाएर नेतृत्वमा सहमति खोज्ने प्रयास भएको हो ।

‘विधानमा भएको व्यवस्थालाई परिमार्जन गर्ने गरी नयाँ प्रस्ताव आउछ’एमालेका एक शीर्ष नेताले लोकान्तरसँग भने । स्रोतका अनुसार उपाध्यक्ष र उपमहासचिवको संख्या बढाउने गृहकार्य चलिरहेको छ ।

शुक्रवार राति बस्ने केन्द्रीय कमिटी बैठकमा सो प्रस्ताव आउने बताइएको छ ।

केन्द्रीय सदस्य महेश बस्नेतले पदाधिकारीको संख्या बढाएर भएपनि सहमतिको प्रयास गरिने लोकान्तरलाई जानकारी दिए ।

असोज १५ देखि १७ गतेसम्म काठमाडौंमा सम्पन्न विधान महाधिवेशनले अध्यक्ष, एक वरिष्ठ र चार उपाध्यक्ष, महासचिव, एक उपमहासचिव र ७ जना सचिव रहनेगरी सहमति गरेको थियो ।

अध्यक्ष केपी शर्मा ओलीसहित केही नेताहरुले पदाधिकारी थप गर्नेबारे गृहकार्य गरिरहेको एक नेताले जानकारी दिए । २ सय २५ सदस्यीय रहने केन्द्रीय कमिटीको संख्या ३ सय हाराहारी पुर्याउने तयारी छ । 

पार्टी महाधिवेशनको बन्द सत्रबाट विधान परिमार्जन गर्ने गृहकार्य चलिरहेको छ ।

शुक्रवार राति ८ बजे बस्ने भनिएको केन्द्रीय कमिटी बैठक राति पौने ११ बजेसम्म शुरू हुन सकेको छैन ।

शनिवार बिहान बन्दसत्र शुरू हुने भएकोले शुक्रवार ढिलै भएपनि केन्द्रीय कमिटीको बैठक बस्ने सचिव गोकर्ण विष्टले जानकारी दिए । जंगल क्राउन होटलमा केन्द्रीय कमिटी बैठक बस्ने तयारी भएको छ। 

सचिव विष्टले पनि पदाधिकारीको संख्या बढाएर भएपनि सहमतिका नेतृत्व चयन गर्नुपर्ने महाधिवेशन प्रतिनिधिको भावना रहेको बताए । उपाध्यक्ष भीम रावलले भने पदाधिकारी संख्या थप गर्नेबारे प्रस्ताव नआएको दावी गरे ।