नेकपा एमालेको दशौं राष्ट्रिय महाधिवेशनका कारण चितवन राष्ट्रिय निकुञ्जको मध्यवर्ती क्षेत्रमा पर्यटकीय गतिविधि बढेको छ ।

एमालेको चितवनमा जारी महाधिवेशनका लागि आएका पार्टीका नेता, प्रतिनिधि तथा कार्यकर्ताका कारण निकुञ्ज र मध्यवर्ती क्षेत्रको पर्यटकीय चहल पहल बाक्लिएको हो 

बाघमारा सामुदायिक वनका कार्यालय सचिव हरि आचार्यले पछिल्लो ३ दिनमा हात्ती सफारी र जंगल सफारी गर्नेको संख्यामा दोब्बरभन्दा धेरैले वृद्धि भएको जानकारी दिए ।

‘कोरोनाका कारण लामो समय बन्द रहेको पर्यटकीय गतिविधिमा एमाले महाधिवेशनले नयाँ तरंग ल्याएको छ,’ उनले भने, ‘अहिले देशभरबाट आएका प्रतिनिधि एवं शुभेच्छुकका कारण तत्काल केही पर्यटकीय गतिविधि बढेको छ । यसले दीर्घकालमा अझै धेरै सकारात्मक प्रभाव पार्ने हामीले विश्वास लिएका छौं ।’

विश्वमै दुर्लभ मानिएको एक सिङ्गे गैंडा हेर्नका लागि निकुञ्ज र मध्यवर्ती क्षेत्रमा आउने गरिन्छ । जंगल सफारीमा जाने व्यक्तिले छ वटासम्म एकसिङ्गे गैंडा, चराचुरुङ्गी, बँदेल, ३ प्रजातिका चित्तल, संकटापन्न अवस्थाको घडियाल गोही सहजै देख्न सक्ने उनले बताए ।

‘यहाँको मध्यवर्ती क्षेत्रको सफारीमा जाँदा गैंडा सहितका केही जनावर सहजरुपमा देख्न पाइन्छ,’ सचिव आचार्यले भने, ‘कहिलेकाहीँ चितुवा र बाघसमेत देख्ने अवसर मिल्छ ।’ 

जंगल सफारीमा गएका व्यक्ति गैंडा सहितका जनावर देख्दा उत्साहित हुने गरेका छन् । पर्वतका एमाले महाधिवेशन प्रतिनिधि हरिहर पोखरेलले जंगल सफारी निकै रोमाञ्चित भएको बताए । ‘जंगल सफारी निकै रमाइलो भयो, दुर्लभ जनावर सहजै देख्न पायौं,’ उनले भने, ‘जंगल सफारीमा जाँदा त्यस क्षेत्रमा महत्त्वपूर्ण रुख ढलेर यसै खेर गइरहेका छन् । जंगल सफारीलाई केही व्यवस्थित गर्नुपर्ने देखिएको छ ।’

साल सिसौका रुख सरकारको महत्त्वपूर्ण सम्पत्ति भएको जनाउँदै नेता पोखरेलले रुखको संरक्षण गर्नुपर्ने बताए ।

‘जंगल सफारीमा जाँदा धेरै रुख ढलेको देखें, तिनीहरूलाई व्यवस्थित गर्नु जरुरी छ,’ उनले भने, ‘ढलेका र पुराना रुख हटाउँदै नयाँ बिरुवा रोपेर त्यसको संरक्षण र जगेर्ना गर्दै पर्यटकीय गतिविधि गर्नुपर्ने देखिन्छ ।’