नेपाली कांग्रेस प्रदेश नम्बर १ को अधिवेशनमा डा. शेखर कोइरालासहित ४ केन्द्रीय नेताले मतदान नगरेका कारण संस्थापनइतरका सभापतिका उम्मेदवार गुरुराज घिमिरे पराजित भएको भन्ने चर्चा भइरहेका बेला सभापतिका आकांक्षी रहेका अन्य नेताहरूले पनि प्रदेश अधिवेशनमा मतदान नगरेको पाइएको छ ।

घिमिरे २ मतले पराजित भएपछि शेखरसहित संस्थापनइतर पक्षका केन्द्रीय नेताहरू सुजाता कोइराला, महेश आचार्य र बलबहादुर केसीले मतदान नगरेको विषय चर्चामा आएको थियो ।

तर, भावी सभापतिका लागि पनि उम्मेदवारी दिने बताएका सभापति शेरबहादुर देउवासहित सभापतिका अन्य आकांक्षीले पनि प्रदेश अधिवेशनमा मतदान नगरेको पाइएको छ ।

देउवाले पार्टीको सुदूरपश्चिम प्रदेश अधिवेशनमा मतदान गरेनन् । 

यसैगरी संस्थापनइतरबाट सभापतिमा उम्मेदवारी दिने बताउँदै आएका प्रकाशमान सिंह हेटौंडा पुगे पनि बाग्मती प्रदेश अधिवेशनमा मतदान नगरेको पाइएको छ ।

सभापतिका अर्का आकांक्षी विमलेन्द्र निधिको प्रदेश (प्रदेश नं. २ )मा अधिवेशन भएको छैन ।

नेतृत्वका आकांक्षीमध्ये रामचन्द्र पौडेल र कृष्ण सिटौला मात्र प्रदेश अधिवेशनमा सहभागी भएका थिए ।

प्रदेश अधिवेशनमा मतदान नगरेको विषय चर्चामा आएपछि शेखरले केन्द्रीय नेताले प्रदेशमा मतदान गर्न पाउने कि नपाउने भन्ने विषयमा 'संशय' रहेकाले कानूनी परामर्श गरेरै आफूले मतदान नगरेको प्रस्ट पारेका छन् ।

'कांग्रेसको १४ औं राष्ट्रिय महाधिवेशनमा प्रदेशसम्म केन्द्रीय नेताहरूले मतदान गर्न पाउने/नपाउने विषयमा शुरूदेखि नै 'संशय' थियो। कानूनी परामर्शबाट मतदान गर्दा भविष्यमा जटिलता आउन सक्ने बुझियो । तसर्थ मतदान नगर्नु उपयुक्त ठानें । यसक्रममा मबाट भएको कमजोरीप्रति सचेत रहँदै गल्ती भए क्षमाप्रार्थी छु,' शेखरले सोमवार ट्वीट गरेका छन् ।

प्रदेश अधिवेशनमा मतदान गर्दा केन्द्रमा उम्मेदवार बन्न पाइन्न भन्ने कुरा निर्वाचन समितिबाट आएकाले शेखर मतदानमा सहभागी नभएको उनको सचिवालयले जनाएको छ ।

'अघिल्लो दिन बुझ्दा निर्वाचन समितिले प्रदेशमा मतदान गर्दा केन्द्रमा उम्मेदवार बन्न पाइँदैन भन्ने कुरा गरेको थियो, सोही कारण कानूनी परामर्श गरेर नै उहाँले मतदान नगर्नुभएको हो,' शेखरका स्वकीय सचिव दिनेशचन्द्र थपलियाले लोकान्तरसँग भने ।

डा. कोइराला आसन्न महाधिवेशनमा संस्थापनइतरबाट सभापतिका आकांक्षी हुन् ।