कांग्रेस सभापति एवं प्रधानमन्त्री शेरबहादुर देउवाले पार्टी सभापतिमा दोहोरिनका लागि उम्मेदवारी मनोनयन दर्ता गराएका छन् ।

प्यानलसहित राष्ट्रिय सभागृह पुगेर देउवाले शुक्रवार अपराह्न उम्मेदवारी मनोनयन दर्ता गराएका हुन् । उनको प्रस्तावकमा गृहमन्त्री समेत रहेका नेता बालकृष्ण खाँण छन् ।

महामन्त्रीको आकांक्षी रहेका खाँण देउवालाई जिताउनका लागि भन्दै पछाडि हटेका छन् ।

देउवा प्यानलबाट उपसभापतिमा पूर्णबहादुर खड्का र विजय गच्छदार उम्मेदवार बनेका छन् । यस्तै महामन्त्रीमा प्रकाशशरण महत र प्रदीप पौडेलको उम्मेदवारी परेको छ । 

सहमहामन्त्रीमा जनजातिबाट भीष्मराज आङ्देम्बे, दलितबाट मानबहादुर विश्वकर्मा, मधेशीबाट महेन्द्र यादव, खस आर्यबाट किशोरसिंह राठोर, थारुबाट उमाकान्त चौधरी, मुस्लिमबाट फर्मुल्लाह मन्सुर, पिछडिएको क्षेत्रबाट जीवन शाही र महिलाबाट डिना उपाध्यायले उम्मेदवारी दर्ता गराएका छन् ।