कांग्रेस सहमहामन्त्री परियारको दाबी- एमालेसहित सबै दलको सहमतिमा संसदबाट एमसीसी पारित हुन्छ

सत्तारुढ नेपाली कांग्रेसका नवनिर्वाचित सहमहामन्त्री जीवन परियारले प्रमुख प्रतिपक्ष दल नेकपा (एमाले) सहितका सबै दलको सहमतिमा सरकारले संसदबाट एमसीसी पारित गराउने दाबी गरेका छन् । 

सहमहामन्त्री परियारले एमसीसीले नेपालमा दिने अनुदान सहायता समृद्धि र विकासका लागि भएकाले सरकारले सबै दलहरूको सहमतिमा सो प्रस्तावलाई संसदबाट पारित गराउने विश्वास व्यक्त गरेका हुन् । 

नेपाल प्रेस युनियन, कास्कीले आइतवार पोखरामा आयोजना गरेको पत्रकार सम्मेलनमा बोल्दै उनले एमसीसीमा राष्ट्रका लागि अहित हुने कुनै पनि विषय भए त्यसलाई हटाउन आफ्नो पार्टी प्रतिबद्ध रहेको बताए । 

सहमहामन्त्री परियारले एमसीसीको बारेमा सत्तारुढ दलहरूलाई एक ढिक्का बनाएर आफ्नो पार्टीले लैजाने बताए । 

‘एमसीसी नेपालमा झण्डै २० वर्ष अगाडिदेखि एमसीसीको बजेट नेपालमा आउन विभिन्न खालका सरकारहरूले काम गरेका छन् । यो काम गर्ने सन्दर्भमा नेपालको कुनै पनि राजनीतिक दल अछूतो छैन,’ उनले भने, ‘त्यसैले गर्दाखेरी म छोटकरीमा भन्न चाहन्छु– एमसीसीले नेपालमा जुन डोनेट गरेर आएको पैसा हो । त्यो पैसा नेपालको विकास र समृद्धिका लागि आएको पैसा हो । यो पैसाको सन्दर्भमा सरकारले जुन खालका सम्झौताहरू गरेको छ ।’

सहमहामन्त्री परियारले आगामी निर्वाचनमा सत्तारुढ दलहरूबीच आवश्यकताको आधारमा सहकार्य हुने पनि स्पष्ट पारे । सबै निर्वाचन क्षेत्रमा भने सत्तारुढ दलहरूबीच सहकार्य गरेर निर्वाचनमा जान सक्ने अवस्था आफूले नदेखेको उनको टिप्पणी थियो ।