अपरिचित समूहले कुमारी बैंक लिमिटेडको सिस्टम ह्याक गर्ने धम्की दिएको छ ।

बैंकको सूचना प्रविधि शाखामा साउदी ग्रूप नाम गरेको इमेलबाट ह्याकरले सिस्टम ह्याक गर्ने चेतावनी सहितको धम्की आएको बैंकले जनाएको छ ।

बैंकका कार्यबाहक प्रमुख कार्यकारी अधिकृत अनुजमणि तिमिल्सिनाले ह्याक गर्ने धम्की आएपछि बैंकको सबै सिस्टम बन्द गरिएको जानकारी दिए ।

उनका अनुसार ह्याकरले चेतावनी दिनासाथ सिस्टम बन्द गरिएको थियो । आवश्यक परीक्षणपछि बैंकका सबै सिस्टम खोल्ने तयारी गरिएको छ ।

धम्की कहाँबाट आयो भन्ने विषयमा थप अध्ययन गरिरहेको बैंकले जनाएको छ । बैंकले आफ्नो फेसबूक पेजमा दिउँसो एक सूचना राख्दै केही समयका लागि बैंकका सबै सिस्टम बन्द रहेको जनाएको छ ।

धम्कीपछि बैंकले एटीएम कार्ड, मोबाइल बैंकिङ एप, इन्टरनेट बैंकिङ लगायतका सेवा बन्द गरेको छ ।

कुमारी बैंकमा आएको चेतावनीपछि सम्पूर्ण बैंकलाई सतर्कता अपनाउन आग्रह गरिएको नेपाल बैंकर्स संघले जनाएको छ । संघका अध्यक्ष अनिल उपाध्यायले अहिलेसम्म कुनै बैंकमा पनि समस्या नआएको जानकारी दिए ।

‘हामीले सबैलाई सतर्कता अपनाउन आग्रह गरिसकेका छौं, अहिले नै आत्तिहाल्नुपर्ने अवस्था छैन,’ उनले भने ।

यसअघि गत साउनमा राष्ट्रिय वाणिज्य बैंक लगायतका बैंकलाई समेत सिस्टम ह्याक गर्ने धम्की आएको थियो ।