एमालेले प्रदेश १ का ८ जिल्लामा सर्वसम्मत नेतृत्व चयन गरेको छ । शुक्रबारदेखि जारी अधिवेशन अन्तरगत प्रदेश १ का १४ जिल्लामध्ये ८ जिल्लाको नेतृत्व सर्वसम्मत चयन गरिएको हो । बाँकी जिल्लामा पनि सर्वसम्मत नेतृत्व चयनका लागि प्रयास जारी रहेको र केही जिल्लामा भने नेतृत्व चयनका लागि निर्वाचन तालिका प्रकाशन गरिएको नेकपा एमाले प्रदेश कमिटीले जनाएको छ । एमालेले झापा, मोरङ, धनकुटा, खोटाङ, तेह्रथुम, भोजपुर,सोलुखुम्बु र पाँचथरको नेतृत्व चयन सर्वसम्मत गरेको हो ।

प्रदेश कमिटी अध्यक्ष तुलसी न्यौपानेका अनुसार एमाले मोरङको अध्यक्षमा ऋषिकेश पोखरेल, झापा अध्यक्षमा दीपक कार्की, खोटाङ अध्यक्षमा रामप्रसाद दंगाल, धनकुटा अध्यक्षमा इन्द्रमणि पराजुली, तेह्रथुम अध्यक्षमा तेजमान कन्दङ्वा, पाँचथर जिल्ला अध्यक्षमा राजकुमार भण्डारी र भोजपुर अध्यक्षमा शरण राई र खोटाङको अध्यक्षमा रामप्रसाद दंगाल सर्वसम्मत निर्वाचित भएका छन् ।

 मोरङ र झापामा भने पदाधिकारी टुंगो लागेपनि सदस्यको भने टुंगो लागिसेकेको छैन । ताप्लुेजुङ्गमा भने सहमतिको प्रयास असफल भएपछि केन्द्रको निर्णय कुरेर नेताहरु बसेका छन् । ताप्लेजुङमा एमाले पार्टी सचिवसमेत रहेका योगेश भट्टराई निकटका बल बहादुर सामसोहाङ  र ओली निकटका भुुपेन्द्र थेवे आकांक्षी बनेपछि सहमतिको प्रयास असफल भएको हो  ।  

प्रदेश कमिटी अध्यक्ष न्यौपानेका अनुसार इलाममा चुनावपछि अहिले मतगणना जारी रहेको छ। उदयपुरमा सहमतिको प्रयास भइरहेको छ भने ओखलढुङ्गामा मतदान भइरहेको छ । सुनसरीमा भने २७ गतेलाई मतदानको मिति तय गरिएको अध्यक्ष न्यौपानेले बताए  । सुनसरीमा अध्यक्षमा तिनजना प्रतिष्पर्धामा उत्रिएका छन । रेवती रवण भन्डारी, खेमराज पोखल्रे र द्वारीकलाल चौधरी चुनावी प्रतिष्पर्धामा होमिएका हुन् । यस्तै उपाध्यक्षमा निलम खनाल, नन्द बस्नेत र लिलम बस्नेतले उम्मेदवारी दर्ता गराएका छन् ।

 सचिवमा परशुराम यादव र शत्रुधन यादवले उम्मेदवारी दिएका छन् । दुई जना उपसचिवका लागि ७ जनाले उमेदवार दिएको निर्वाचन समितिका संयोजक गोविन्द मिश्रले बताए । उपसचिवमा राम कोइराला, यज्ञराज खड्का, पदम प्रसाद लिम्बु, तहरुमाया जिमि, अन्जनी पोख्रेल र लोकेश निरौलाले मनोनयन दर्ता गराएका छन । १ सय ३५ सदस्य जिल्ला कमिटीका लागि ३ सय भन्दा वढीको उम्मेदवारी परेको छ ।
कुल १४ जिल्ला रहेको प्रदेश १ मा संखुवासभामा भने अधिवेशन भएको छैन ।