राष्ट्रिय सभा निर्वाचनमा प्रदेश १ मा  सत्ता गठबन्धनभित्र अन्तर्घात भएको छ । त्यसको फाइदा प्रतिपक्षी दल एमालेलाई भएको छ । 

प्रदेश १ मा गठबन्धनका उम्मेदवार हेमराज राई थुलुङ पराजित भएका छन् भने नेपाली कांग्रेस र नेकपा एमालेका उम्मेदवारको मत बराबर आएको थियो ।

कांग्रेसका उम्मेदवार गोपाल बस्नेत र एमालेका उम्मेदवार गुरु बरालको बराबर मत आएको हो । दुवैले समान ४ हजार ४८८ मत पाएका थिए । तर, गोलाप्रथाबाट कांग्रेसका बस्नेत विजयी भए ।

अल्पसंख्यकतर्फका उम्मेदवार एवं जनता समाजवादी पार्टीका नेता हेमराज राई थुलुङलाई एमालेका उम्मेदवार सोनाम ग्याल्जेन शेर्पाले पराजित गरेका छन् । 

प्रदेश १ मा एमालेभन्दा सत्ता गठबन्धन १४४ मतभारले अगाडि थियो । 

प्रदेश १ मा प्रदेशसभा सदस्य ९३ जना (हाल ९२) र स्थानीय पालिका प्रमुख/उपप्रमुख २७४ (हाल २७२) गरी ३६४ मतदाता थिए । 

३ सय ६७ मतदातामध्ये तीन सदस्य रिक्त थियो ।

प्रदेश १ मा ५० प्रदेश सांसद र १२६ पालिका प्रमुख/उपप्रमुख रहेको पाँच दलीय सत्ता गठबन्धनसँग ४ हजार ६६८ मतभार थियो । 

४१ प्रदेश सांसद र १४२ प्रमुख/उपप्रमुख रहेको एमालेको मतभार ४ हजार ५२४ थियो । एमाले सत्ता गठबन्धन भन्दा १४४ मतभारले पछाडि थियो ।

निर्वाचनको क्रममा खसेको चार मत बदर हुँदा एमालेलाई फाइदा पुगेको थियो । 

गठबन्धनको मत पनि एमालेले तान्न सफल भएको छ । 

बाँकी ६ वटै प्रदेशमा नतिजा निकाल्न नसकेको एमालेले प्रदेश १ मा भने एक सिट हात पार्‍यो ।

गठबन्धनमा रहेका पार्टीका सांसद र स्थानीय तहका प्रमुख/उप–प्रमुखले गठबन्धनको पक्षमा इमान्दारितपूर्वक मत हालेको भए एमालेले राष्ट्रिय सभामा एउटा सिट पनि जित्ने अवस्था थिएन ।

तर, एमालेले गठबन्धनबाट मत तानेर जित निकाल्न सफल भएको छ । 

आज भएको मतदानमा प्रदेश १ मा एक प्रदेश सांसद सहित तीन मतदाताले भोट हालेका थिएनन् । त्यसमा पनि एमालेकै सांसद मतदानमा अनुपस्थित भएका थिए ।

एमालेबाट प्रदेशसभा सदस्य निर्वाचित गुलेफन खातुन मतदानमा सहभागी भएकी थिइनन् । 

निर्वाचनमा प्रदेशसभा सदस्यको मतभार ४८ र स्थानीय तहका प्रमुख/उपप्रमुखको मतभार १८ हुन्छ ।

राष्ट्रिय प्रजातन्त्र पार्टीबाट निर्वाचित गौरीगञ्ज गाउँपालिकाका अध्यक्ष बाबुराजा श्रेष्ठ पनि राष्ट्रिय सभा सदस्यको मतदानमा सहभागी भएनन् ।

विराटनगर महानगरपालिकाकी उपमेयर इन्दिरा कार्की पनि मतदानमा गइनन् ।