मोरङमा उखुबारीमा गाडेको अवस्थामा पुरुषको शव फेला परेको छ ।

धनपालथान गाउँपालिका–७ कमलपुरमा उखुबारीभित्र एक पुरुषको शव फेला परेको हो ।

उखु काट्न गएका किसानले बारीमा खाल्डो देखेपछि प्रहरीलाई खबर गरेका थिए । प्रहरीले खाल्डो खन्दा गाडेको अवस्थामा पुरुषको शव फेला परेको जनाइएको छ ।

खाल्डो खनेर कपडासहित गाडेको अवस्थामा फेला परेको पुरुषको पहिचान भइनसकेको जिल्ला प्रहरी कार्यालय मोरङले जनाएको छ ।

शव सडेको अवस्थामा फेला परेको छ । खाल्डो शंकास्पद रहेको जानकारी आएपछि ईलाका प्रहरी कार्यालय रंगेलीको टोलीले बिहीवार खनेको थियो । खाल्डोमा अन्दाजी ३०–३५ वर्षीय पुरुषको शव भेटिएको प्रहरीले जनाएको छ । ५ फिट गहिरो खाल्डोमा शव भेटिएको छ ।

शव भेटिएको स्थाननजिकै अर्काे खाल्डो पनि रहेको प्रहरीले बताएको छ । शंकास्पद रहेकाले अर्काे खाल्डो पनि खन्ने तयारी भइरहेको प्रहरीले जनाएको छ ।

‘करीब १५ मिटर टाढा अर्काे शंकास्पद खाल्डो भेटिएको छ । खाल्डो खन्ने काम भइरहेको छ,’ जिल्ला प्रहरी कार्यालय मोरङका प्रहरी उपरीक्षक जनार्दन जिसीले भने, ‘खाल्डोमा कपडा भेटियो, गन्ध पनि आइरहेको छ । गन्ध धेरै आएकाले खन्न पनि समस्या भएको छ ।’