साताको पहिलो दिन आइतवार नेप्से परिसूचक १०५.५५ अंकले बढेको छ । 

गत साता डेढ सय अंक भन्दा बढीले घटेको शेयर बजार आइतवार भने पुनः बढ्न शुरू गरेको हो । 

आइतवार शेयर देखिएको सबै समूहहरूको सूचक हरियालीले लगानीकर्तालाई उत्साहित बनाएको छ । नेप्से परिसूचक आइतवार ३.८० प्रतिशतले बढ्दा २८८५.५३ अंकमा पुगेको छ । 

गत साता २९ सय अंकमाथि पुगेको शेयर बजार पुनः उकालो यात्रामा लाग्ने संकेत यो साताको पहिलो दिनको कारोबारले देखाएको छ । बजार बढेको दिन विन नेपाल लघुवित्त वित्तीय संस्था, लिवर्टी इनर्जी कम्पनी, शिवश्री हाइड्रो र नेपाल इफ्रास्टक्चर बैंकको शेयर मूल्यमा सकारात्मक सर्किट लागेको छ । यी चारवटै कम्पनीको शेयर मूल्य १० प्रतिशतले बढेको छ । 

बजार बढेको दिन मन्जुश्री फाइनान्स कम्पनीको ऋणपत्र ८५, एनआईसी एशिया सेलेक्ट फण्ड, मेगा म्यूचूअल फण्ड, सानिमा लार्ज क्यापिटलसहितकाले मात्रै गुमाएका छन् । आइतवार बढी गुमाउनेमा भने सबै ऋणपत्र तथा म्युचुअल फण्ड मात्रै छन् । 

कारोबार भएको मध्ये सबैभन्दा बढी अपि पावर कम्पनीको २६ करोड १५ लाख रूपैयाँको र नेपाल टेलिकमको २३ करोड ६२ लाख रूपैयाँको कारोबार भएको छ । आइतवार २३१ कम्पनीको एक करोड २१ लाख कित्ता शेयरको ८१ हजार ७०६ पटक कारोबार भएको छ । 

यसबाट ६ अर्ब ३२ करोड रूपैयाँको कारोबार भएको छ ।