सरकारसँग कोरोना  भाइरस सङ्क्रमितको निःशुल्क उपचार गर्ने सम्झौता गरेको चितवन मेडिकल कलेजले पैसा लिएको भन्दै सात दिनमा नौ जनाले उजुरी  दिएका  छन् ।  

जिल्ला  प्रशासन  कार्यालय  चितवनले निःशुल्क   उपचार  भए/नभएको  भन्दै  उजुरी  दिन  सूचना जारी गरेपछि आइतबार अन्तिम दिनसम्म नौ जनाको उजुरी परेको हो ।

९६६ जनाको उपचार गरेको र उनीहरूबाट १० करोड ९५ लाख आठ हजार रुपियाँ माग दाबी गर्दै चितवन मेडिकल कलेजले सरकारसँग भुक्तानी माग गरेको छ ।

सरकारले निःशुल्क उपचार गर्न भने पनि अस्पतालले कोरोना  सङ्क्रमितसँग  पैसा  असुलेको  पीडितले  बताएका छन् ।  

उजुरी  हाल्नेमध्ये  गोरखाका  विष्णु  श्रेष्ठले  भने, “पैसा  नदिई  अस्पतालले  कसैलाई  उपचार  गरेको  छैन  र कोभिड भएका सबै चर्को रकम तिर्न बाध्य भएका छन् । ”

दाजु  रामलाल  श्रेष्ठलाई  गत  जेठ  २  गते  उपचारका  लागि अस्पतालमा   लगेका श्रेष्ठले   कोभिड   देखिएपछि हरेक  दिन  रगत  परीक्षण  गर्न  लगाउने  र  हरेक  पटकको परीक्षणमा चार हजारदेखि छ हजार रुपियाँसम्म लिने गरेको बताए ।

“मृत्यु भइसकेको थाहा पाएर पनि भेन्टिलेटरमा राख्ने र  दुई  दिनपछि  मृत्यु  भयो  भनेर  जानकारी  दिने  गरेका थिए,”  श्रेष्ठले  भने ।  उनले भने,  “मेरो  दाजुको अबस्था  गम्भीर  छ  भन्दै  पाँच  दिन  भेन्टिलेटरमा  राखेर अन्तिममा  मृत्यु  भयो  भनेर  जानकारी  दिइयो । ”

 हामीले आश  मारिसकेका  थियौँ,  अवस्था  के  छ  भनेर  जानकारी दिन  दबाब  दिँदासमेत  चुप  लागेर  बसे ।  पछि  दाजुको  जेठ २०  गते  मृत्यु  भएको  जानकारी  दिइयो ।  मृत्युको  प्रमाणपत्र लिँदासमेत  हृदयाघातबाट  मृत्यु  भएको  भन्दै  झुटो  कागज बनाएर हैरानी दिएको दुःखेसो उनको छ ।

उनले  कोभिड  भएर  भेन्टिलेटरमा  उपचार  गर्न गएकाहरू   थोरै   मात्र   निको   भएको   आफूले   देखेको बताए । “मैले तीन लाख रुपियाँ तिरेको दाबीसहितको उजुरी  गरेको  छु,  अन्य  बिल  पनि  सुरक्षित  छ,”  उनले भने,  “प्रशासन  कार्यालयबाट  न्याय  पाइएन  भने अख्तियारमा पनि उजुरी हाल्नेछु । ”

गत वैशाखमा आमालाई कोभिडको उपचार गराउन अस्पताल लएका भरतपुर महानगरपालिकाका   हरिशचन्द्र   बानियाँले   उपचारपछि १०  दिनमा  तीन  लाख  रुपियाँ  तिरेर  आमालाई  घरमा ल्याए ।  उनले  बिल  भुक्तानी  गरे  पनि  अस्पतालले निःशुल्क  उपचार  गराएको  भन्दै  सरकारसँग  माग  दाबी गरेको  छ ।  

सञ्चार  माध्यममा  समाचार  आएपछि  आफूले प्रशासनमा उजुरी हालेको जानकारी बानियाँले दिए । उनी  मात्र  होइन,  सिराहाका  मनोज  सिंह,  भरतपुरका हिमालक्ष्मी  भट्ट,  कृष्ण  भण्डारी,  तेज  प्रजापति,  सरोेज सिलवाल,  चितवन  खैरहनीका  भीमबहादुर  क्षेत्री,  बाराको जितपुर  सिमराका  केशवप्रसाद  न्यौपाने  र  गोरखाका  विष्णु श्रेष्ठले प्रशासनमा उजुरी दिएका छन् । गोरखापत्र दैनिकमा शालिग्राम नेपालले खबर लेखेका छन्।