नेकपा माओवादी केन्द्रको केन्द्रीय समिति बैठक शुक्रबार बस्दैछ । प्रतिनिधिसभाबाट एमसीसी पास भएपछि बस्न लागेको सो पार्टीको बैठकलाई महत्वका साथ हेरिएको छ । एमसीसी पास गराउन पार्टीले खेलेको भूमिकालाई लिएर माओवादीभित्र आन्तरिक विवाद चर्किरहेको बेला बैठक बस्न लागेको हो । 

माओवादी केन्द्रका नेता गणेश साहले केन्द्रीय समिति बैठकमा एमसीसी सम्झौता, पदाधिकारी चयन, स्थायी समिति, पोलिटब्युरो, नेताहरूको जिम्मेवारी बाँडफाँट, केन्द्रीय समितिलाई पूर्णता दिने, स्थानीय तहका निर्वाचनसहित पछिल्लो राजनीतिक अवस्थालगायतका विषयमा छलफल हुने बताए ।

एमसीसी पास भएपछि नेता नारायणकाजी श्रेष्ठ, गिरिराजमणि पोखरेल, लिलामणि पोखरेललगायतका नेता असन्तुष्ट छन् । उनीहरुले बैठकमा सहभागी भएर अध्यक्ष प्रचण्डको कार्यशैलीको चर्को रूपमा आलोचना गर्ने तयारी गरेका छन् ।  

यस्तै सो पार्टीका पदाधिकारी चयन तथा नेताहरूको जिम्मेवारी बाँडफाँट पनि अझै हुन सकेको छैन । ११ देखि १८ पुसमा माओवादी केन्द्रले आठौं राष्ट्रिय महाधिवेशन सम्पन्न गरेको थियो । यसबीचमा बसेको केन्द्रीय समिति बैठकले अध्यक्षमा प्रचण्डलाई सर्वसम्मत निर्वाचित गरेको थियो । अन्य पदाधिकारी चयन, स्थायी समिति, पोलिटब्युरो, नेताहरूको जिम्मेवारी बाँडफाँट, केन्द्रीय समितिलाई पूर्णता दिने काम अझै बाँकी रहेको हो ।