नेकपा एकीकृत समाजवादीले स्थानीयदेखि प्रतिनिधि सभा चुनावसम्म अहिलेको सत्ता गठबन्धनका दलहरूबीच चुनावी तालमेलका लागि प्रस्ताव गर्ने भएको छ । 

नेकपा एसका उपमहासचिव गंगालाल तुलाधरले केन्द्रमा सहमति नभए पनि स्थानीयस्तरमा चुनावी तालमेल हुने बताए । 

बुधवार राजधानीमा बसेको केन्द्रीय कमिटी बैठकपछि पत्रकारहरूसँग कुरा गर्दै तुलाधरले स्थानीयदेखि प्रदेश र संघसम्मै चुनावी तालमेल गर्न आफूहरूको प्रस्ताव रहेको बताएका हुन् । 

‘स्थानीय तहको निर्वाचनमा सम्पूर्ण तागत लगाएर, ठूलो पार्टी बन्ने प्रयास हुनेछ । स्थानीय तहको चुनाव संघीय चुनावको कास्टिङ भएकोले, सम्पूर्ण शक्ति लगाउने निर्णय गर्दैछौँ । चुनावका लागि एक महिने राष्ट्रिय जनपरिचालन अभियानको घोषणा हुन्छ,’ तुलाधरले भने । 

अहिलेको गठबन्धन ऐतिहासिक आवश्यकता भएकोले स्थानीय तहसम्म तालमेल हुने उनले बताए । ‘स्थानीय तहमात्र होइन संघीय चुनावसम्म मिलेर सहमति गरेका छौं । केन्द्रले नचाहँदानचाहँदै पनि स्थानीयस्तरमा चुनावी तालमेल हुन्छ,’ तुलाधरले भने ।