कांग्रेस कार्यकर्तालाई गगनले भने- एमालेहरूले एमसीसीबारे सोधे बालकोट जाने बसको टिकट काटिदिनू

नेपाली कांग्रेसका महामन्त्री गगन थापाले अमेरिकी आर्थिक सहयोग कार्यक्रम एमसीसी नेपालका राजनीतिक दलको इमान्दारिता नाप्ने अवसर भएको बताएका छन् । गणतन्त्रपछि बनेका कुनै पनि सरकार एमसीसीको निर्णयमा अछुतो नरहेकोले चुनावमा कांग्रेसलाई घाटा नहुने उनले बताए । 

नेपाली कांग्रेसले बुधवार काभ्रेको बनेपामा आयोजना गरेको कार्यक्रममा महामन्त्री थापाले अगामी चुनावमा एमसीसीलाई लिएर भ्रमको व्यापार गरिरहेका दलको दोकान बन्द गर्नुपर्ने बताएका हुन् । 

‘आगामी चुनावमा भ्रमका व्यापारीको दोकान बन्द गर्नुपर्छ । एमसीसीबारे कांग्रेसले पुस्तक बनाएका छौं पढ्नुस् र जवाफ दिने अवस्थामा बस्नुस्,’ महामन्त्री थापाले भने, ‘एमसीसीबारे एमाले कार्यकर्ताले प्रश्न सोधे भने बालकोट जाने बसको टिकट काट्दिनुस् र ‘बा’लाई प्रश्न सोध्न लगाउनुस्– २०७५ साल माघ ५ गते एमसीसीबारे के निर्णय भएको थियो ।’

माओवादी कार्यकर्ताले प्रश्न गरेमा उनीहरूले गरेको निर्णय सोध्न प्रचण्डको घरमा जाने बसको टिकट काट्दिन कार्यकर्तालाई उनले सुझाव दिए । 

महामन्त्री थापाले कांग्रेसले अवसर पाए केपी ओलीले जस्तो कार्यकाल पूरा नगरी संसद् विघटन नगर्ने बताए ।