उदयपुरकी रसमिला मगर सोमवार ललितपुरको जावलाखेल मैदानमा म्यादी प्रहरीका लागि अन्तर्वार्ता दिइरहेकी थिइन् । कक्षा १२ सकेर बसेकी उनी पढाइ खर्च जुटाउन र अनुभवका लागि पनि म्यादी प्रहरीमा भर्ना हुन आएको बताइन् । 

‘अलिकति खर्च पनि जुट्ने र अनुभव पनि हुने भएकाले म्यादी बन्न आएकी हुँ,’ लोकान्तरसँगको कुराकानीमा उनले भनिन्, ‘भविष्यमा सुरक्षा सेवामा प्रवेश गर्न सजिलो होला भन्ने पनि हो ।’

रसमिलाजस्तै सिराहा लहानका रामशंकर चौधरी पनि पढाइ खर्च जुटाउन म्यादी प्रहरीमा भर्ना हुन आएको बताए । 

कक्षा १२ उत्तीर्ण उनी काठमाडौंमा रङ लगाउने र ग्यारेजमा काम गर्ने गर्छन् । ‘ब्याचलर पढ्नका लागि खर्च जुट्ला भनेर यता आएको हुँ,’ चौधरीले भने । रङ्रोगनको कामले पढाइका लागि पैसा नपुग्ने उनी बताउँछन् । 

म्यादी प्रहरी बन्न विद्यार्थी मात्रै होइन किसान पनि लाइनमा देखिए । 

बागमती गाउँपालिका–५ का ५० वर्षीय भगवत शंकर घिमिरे खेतीपातीको काम नभएकाले म्यादीमा भर्ना हुन आएको बताए । ‘अहिले खेतीपातीको काम छैन,’ उनले भने, ‘दुई महिनामा केही पैसा कमाइएला भनेर आएको हुँ ।’

उनी २०७४ को चुनावमा पनि म्यादी प्रहरी भइसकेका व्यक्ति हुन् । उनले खेतीबाट फुर्सद भएकाले समयको सदुपयोग र प्रहरीलाई पनि सहयोग गर्न आएको उनी बताउँछन् । 

गोदावरीकी २६ वर्षीया प्रमिला परियार कटाइसिलाइको काम गर्छिन् । तर, त्यसबाट खासै आम्दानी नभएपछि म्यादी प्रहरी बन्न आएको बताइन् । ‘अलिकति भए पनि कमाइ होला भनेर आएको हुँ,’ उनले भनिन् । 

उनीहरू जस्तै दुई हजार ९०४ जनाले महानगरीय प्रहरी परिसर ललितपुरमा म्यादी प्रहरीका लागि आवेदन दिएको डीएसपी शरद थापाले जानकारी दिए । 

उनका अनुसार एक हजार १२५ जनाको दरबन्दीका लागि १४ सय जनाले लिखितमा नाम निकालेका छन् । सोमवार बिहान १५ ठाउँमा व्यवस्थापन गरेर अन्तर्वार्ता लिएको डीएसपी थापाको भनाइ छ । 

देशभर एक लाख म्यादी प्रहरीका लागि दुई लाख ९३ हजार ५०० जनाले आवेदन दिएको प्रहरी प्रधान कार्यालयले जनाएको छ ।