नेपाली कांग्रेसका सभापति शेरबहादुर देउवाले शान्तिपूर्ण निर्वाचन भएकोमा धन्यवाद व्यक्त गरेका छन् । इलाम २ को प्रतिनिधिसभा र बझाङ प्रदेशसभा १ मा शान्तिपूर्ण निर्वाचन सफल भएको भन्दै देउवाले सबैलाई धन्यवाद दिएका हुन् । 

‘इलाम जिल्ला प्रतिनिधिसभा निर्वाचन क्षेत्र नं २ र बझाङ जिल्ला प्रदेशसभा क्षेत्र नं १ मा शनिवार भएको मतदान शान्तिपूर्ण रुपमा सम्पन्न भएको छ । मतदानमा मतदाताले जनाउनु भएको सहभागिताबाट फेरि एकपटक नेपाली नागरिकको लोकतन्त्रप्रतिको अगाध र अविचलित आस्था अभिव्यक्त भएको छ,’ शनिवार विज्ञप्ति जारी गर्दै देउवाले भनेका छन्, ‘यो उप–निर्वाचनबाट आउने परिणामले मुलुकलाई लोकतान्त्रिक संस्कार र संस्कृतिमा आधारित समतामूलक एवं न्यायपूर्ण समाज निर्माणमा सहयोग गर्नेछ भन्ने बिश्वास लिएको छु । निर्वाचनमा संयम र धैर्यका साथ सरिक भइ अमूल्य मत खसाल्नु भएकोमा इलाम जिल्ला प्रतिनिधिसभा निर्वाचन क्षेत्र नं २ र बझाङ प्रदेशसभा १ का सम्पूर्ण दिदीबहिनी तथा दाजुभाइप्रति हार्दिक आभार एवं कृतज्ञता व्यक्त गर्दछु ।’

उप–निर्वाचनमा सक्रिय सहभागिता जनाएर अभिव्यक्त भएको अमूल्य मतले संघीय लोकतान्त्रिक गणतन्त्रलाई सुदृढ र संस्थागत गर्न थप योगदान पुर्याएको सभापति देउवाको भनाइ छ । 

‘शान्तिपूर्ण र भयरहित वातावरणमा निर्वाचन गराउन सफल भएकोमा निर्वाचन आयोगलाई विशेष धन्यवाद दिन चाहन्छु । निर्वाचन सफल गराउन अहोरात्र खटिनु भएका राष्ट्रसेवक कर्मचारी र सुरक्षा निकायलाई धन्यवाद दिन चाहन्छु,’ उनले भनेका छन्, ‘साथै, निर्वाचनमा सहभागी राजनीतिक दल, सञ्चारकर्मी साथीहरूप्रति समेत हार्दिक धन्यवाद तथा आभार व्यक्त गर्दछु ।’