आसन्न स्थानीय तह निर्वाचनमा चितवनको भरतपुर महानगरपालिकाको मेयर नछाड्न नेपाली कांग्रेसका स्थानीय नेताहरूले पार्टी नेतृत्वलाई दबाब दिएका छन् ।

भरतपुरमा नेकपा माओवादी केन्द्रबाट निर्वाचित रेनु दाहाल मेयर छिन् । माओवादी अध्यक्ष पुष्पकमल दाहाल ‘प्रचण्ड’ले भरतपुरको मेयरमा पुनः रेनु नै दोहोरिने बताइरहेका बेला कांग्रेसभित्र दबाब बढेको हो ।

चितवन कांग्रेसका निवर्तमान जिल्ला सभापति जितनारायण श्रेष्ठ नेतृत्वको स्थानीय नेताको टोलीले वरिष्ठ नेता तथा गठबन्धन कार्यदलका संयोजक  रामचन्द्र पौडेललाई ज्ञापनपत्र बुझाउँदै भरतपुरको मेयर नछाड्न दबाब दिएको छ ।