शेखरको जिल्लामा कांग्रेसलाई बाहिर राख्दै तीन दलीय गठबन्धनको तयारी

केन्द्रमा ५ दलीय गठबन्धनको तालमेल गर्ने तयारी भइरहँदा मोरङमा भने तीन दलीय गठबन्धनको तयारी थालिएको छ ।

शुक्रवार सत्ता गठबन्धनको सबैभन्दा ठूलो पार्टी नेपाली कांग्रेसबाहेकको गठबन्धन बनाउने तीन दलका नेताहरूले छलफल गरेका छन् । विराटनगरको एक होटेलमा उनीहरूले छलफल गरेका हुन् । 

कांग्रेसले गठबन्धनमा रहेका अन्य दलहरूलाई हेप्न खोजेको भन्दै नयाँ गठबन्धन बनाउन आवश्यक देखिएको बैठकले निष्कर्ष निकालेको छ । 

कांग्रेस केन्द्रीय समितिले गठबन्धन गर्ने निर्णय गरे पनि शेखर कोइरालाको गृह जिल्ला मोरङमा कांग्रेसले गठबन्धन गर्न अनिच्छा देखाएपछि नेकपा माओवादी केन्द्र, एकीकृत समाजवादी र जनता समाजवादी मोरङमा छुट्टै गठबन्धन बनाउने तयारीमा जुटेका छन् । 

नेकपा माओवादी केन्द्रका प्रदेश कमिटि सचिव गणेश उप्रेतीले केन्द्रमा एउटा निर्णय गर्ने र तल आउँदा गठबन्धनमै रहेका दलहरूलाई दम्भ देखाउन थालेकाले तीन दलीय गठबन्धनका लागि छलफल शुरू गरेको बताएका छन् । 

जसपाका नेता उमेश यादवले विराटनगरमा कांग्रेससँग गठबन्धन नै गर्न नहुने बताए । गत स्थानीय तहको चुनावमा मेयरका प्रत्यासी रहेका उनले गत चुनावका मतदाता शिक्षा जनतामा पुर्‍याउन नसकेकाले हार व्यहोरेको बताए । ‘अहिले तीन दलको गठबन्धन र मतदाता शिक्षालाई मतदातामाझ पुर्‍याउने समय भएकाले कांग्रेससँग गठबन्धन गर्नु हुँदैन भन्ने पक्षमा छौँ,’ उनले भने । 

संस्थापनइतर समूहको वर्चस्व रहेको मोरङमा पालिकास्तरमा कांग्रेसले एक्लै चुनावमा भिड्ने निर्णय गर्न थालेको छ । विराटनगर महानगर समिति र सुनवर्षी नगर समितिले स्थानीय चुनावमा अन्य दलसँग तालमेल नगर्ने निर्णय नै गरिसकेका छन् । 

विराटनगरका १७ स्थानीय तहमध्ये गत चुनावमा विराटनगर महानगरपालिकासहित एक्लै चुनावमा भिड्दा ९ वटा स्थानीय तह जितेको थियो । उर्लाबारी, रतुवा माई, लेटाङ, सुनवर्षी, सुन्दरहरैंचा नगरमा जितेको कांग्रेसले कटहरी, केराबारी, धनपालथान गाउँपालिका जितेको थियो ।

बूढीगंगा गाउँपालिकामा विजय गच्छदार नेतृत्वमा रहेको तत्कालीन फोरम लोकतान्त्रिकले जितेको थियो । गच्छदारको दल कांग्रेसमा गाभिएपछि अहिले मोरङमा १० स्थानीय तह कांग्रेसको नेतृत्वमा छ । 

मोरङका सभापति डिकबहादुर लिम्बुले आजै जिल्ला कमिटीको बैठक राखिएकाले त्यसपछि मात्रै गठबन्धनको विषयमा बोल्न सकिने बताए ।