उम्मेदवार छनोटबारे निर्णय लिन कांग्रेस निर्वाचन परिचालन कमिटीको बैठक बस्दै

उम्मेदवार छनोटलगायत विषयमा छलफल गर्न नेपाली कांग्रेसले गठन गरेको स्थानीय तह निर्वाचन परिचालन समितिको बैठक आज बस्दैछ ।

पार्टी केन्द्रीय कार्यालय सानेपामा दिउँसो १ बजे पछि बैठक बस्ने एक केन्द्रीय सदस्यले जानकारी दिए । 

स्थानीय तहको निर्वाचनमा सत्ता गठबन्धनबीच चुनावी तालमेल गर्ने निर्णय गरेको कांग्रेसले उम्मेदवार सिफारिशको मापदण्ड बनाउने तयारी गरेको छ । गठबन्धनबीच वैशाख ४ सम्ममा सम्भावित उम्मेदवारको सूची सिफारिश गर्न मातहतको संयन्त्रलाई जिम्मा लगाएको छ । 

कांग्रेसले उपसभापति पूर्णबहादुर खड्का संयोजक र उपसभापति धनराज गुरुङ तथा महामन्त्रीद्वय गगन थापा र विश्वप्रकाश शर्मा सहित ५५ सदस्यीय निर्वाचन परिचालन समिति गठन गरेको थियो ।

वैशाख ३० गते हुने स्थानीय तह निर्वाचनका लागि वैशाख ११ र १२ गते उम्मेदवार मनोनयन गर्ने निर्वाचन कार्यतालिका छ ।