स्थानीय निर्वाचन परिचालनका लागि कांग्रेसले सातै प्रदेशमा सहमहामन्त्रीलाई खटाउने

नेपाली कांग्रेसले स्थानीय तह निर्वाचन परिचालनका लागि सात प्रदेशमा सहमहामन्त्रीलाई खटाउने भएको छ । 

प्रदेश र जिल्ला समितिसँग समन्वय गर्नका लागि सहमहामन्त्रीलाई पठाउने निर्णय कांग्रेसको निर्वाचन परिचालन समितिले गरेको हो । 

पार्टी केन्द्रीय कार्यालय सानेपामा शुक्रवार बसेको उपसभापति पूर्णबहादुर खड्का नेतृत्वको निर्वाचन परिचलान समिति बैठकले सातै प्रदेशमा सहमहामन्त्रीलाई खटाउने निर्णय गरेको हो ।

‘सहमहामन्त्रीले प्रदेश र जिल्ला समितिको समन्वय तथा गठबन्धनका पार्टीभित्रको असमञ्जस्यतालाई मिलाउने काम गर्नेछन्,’ निर्णयबारे केन्द्रीय सदस्य नैनसिंह महरले भने । 

कांग्रेस निर्वाचन परिचालन समिति बैठकले गठबन्धनलाई थप प्रभावकारी बनाउने निर्णय गरेको छ । बैठकले चुनावी तालमेलबारे पार्टीको निर्णय कार्यान्वयन नगर्नु पार्टीको अनुशासन उल्लंघन हुने समेत निष्कर्ष निकालेको छ ।  

‘चुनावी गठबन्धन सम्बन्धमा केन्द्रीय समितिले गरेको निर्णय पालना गर्नु सभापतिलगायत सबैको दायित्व हो । उल्लंघन गर्ने विषय पार्टीको अनुशासनको दायरको विषय हुन्छ भन्ने पनि समितिको निचोड छ,’ महरले भने, ‘तर गठबन्धन स्थानीय आवश्यकता र औचित्यको आधारमा हुन्छ । कुनै ठाउँमा गठबन्धन दलबीच प्रतिस्पर्धा हुन पनि सक्छ ।’

कांग्रेसले उपसभापति पूर्णबहादुर खड्का संयोजक र उपसभापति धनराज गुरुङ तथा महामन्त्रीद्वय गगन थापा र विश्वप्रकाश शर्मासहित ५५ सदस्यीय निर्वाचन परिचालन समिति गठन गरेको थियो । 

वैशाख ३० गते हुने स्थानीय तह निर्वाचनका लागि वैशाख ११ र १२ गते उम्मेदवार मनोनयन गर्ने निर्वाचन कार्यतालिका छ ।