वैशाख ३० हुने स्थानीय तह निर्वाचनमा लुम्बिनी प्रदेशबाट ३२ लाख मतदाताले मतदानमा भाग लिन पाउने भएका छन् ।

१२ जिल्लाका १०९ स्थानीय तहका ३२ लाख १९ हजार ४५६ मतदाताले जनप्रतिनिधि चुन्नेछन् ।

यस पटकको निर्वाचनमा रूपन्देहीमा सबैभन्दा धेरै ६ लाख २५ हजार ३६० मतदाता छन् । सबैभन्दा कम रुकुमपूर्वमा ३३ हजार ५१८ मतदाता रहेका प्रदेश निर्वाचन कार्यालय दाङका सूचना अधिकारी गेहेन्द्र कुँवरले लोकान्तरलाई जानकारी दिए । 

दाङमा ४ लाख ९९ हजार २, अर्घाखाँचीमा १ लाख ६३ हजार ८१५, कपिलवस्तुमा ३ लाख ७३ हजार १०० मतदाता छन् । 

गुल्मीमा २ लाख २४ हजार २७६, पश्चिम नवलपरासीमा २ लाख ३७ हजार १२५, पाल्पामा १ लाख ९९ हजार ६९०, प्यूठानमा १ लाख ५६ हजार ३४६, बर्दियामा ३ लाख ११ हजार ४१०, बाँकेमा ३ लाख २९ हजार ४७३ र रोल्पामा १ लाख ४५ हजार ४४४ मतदाता रहेका कुँवरले जानकारी दिए । लुम्बिनीमा ५० लाख जनसंख्या छ । 

प्रदेशका ४ वटा उपमहानगरपालिकामध्ये लुम्बिनी प्रदेशमा सबैभन्दा बढी मतदाता घोराही उपमहानगरपालिकामा १ लाख १२ हजारभन्दा बढी छन्, जुन २०७४ सालको चुनावभन्दा ३४ हजार ५०० जनाले बढी हो । दोस्रो बढी मतदाता रहेको तुलसीपुर उपमहानगरपालिकामा २०७४ सालको भन्दा ३० हजार ७८४ मतदाता थपिएर यसपटक १ लाख ७ हजार पुगेका छन् ।

बुटवल उपमहानगरपालिकामा ९० हजार मतदाता छन् । गत निर्वाचनभन्दा बुटवलमा २४ हजार मतदाता थपिएका छन् ।  

नेपालगञ्ज उपमहानगरपालिकामा ८१ हजार मतदाता छन् । चुनाव आउन अब २३ दिन मात्र बाँकी छ । निर्वाचनको मुखमा राजनीतिक दलहरू उम्मेवार छनोट र सिफारिसमा व्यस्त छन् भने निर्वाचन कार्यालय आवश्यक सामग्री खरिददेखि आन्तरिक तयारीसम्मका काममा व्यस्त छ ।

‘निर्वाचन अधिकृतहरूलाई निर्वाचनसम्बन्धी आवश्यक सामग्री बुझाउने, निर्देशन दिने, दलहरूलाई पनि बोलाएर छलफल गर्ने काम भइरहेको छ,’ कुँवरले भने ।
 
लुम्बिनी प्रदेशभर १ हजार ६२९ मतदानस्थल र ३ हजार ८३२ मतदान केन्द्र निर्धारण गरिएको छ । निर्वाचनलाई सुरक्षित बनाउन संवेदनशीलताको आधारमा वर्गीकरण गरिएको छ । १५३ वटा मतदानस्थललाई सुरक्षा संवेदनशीलताका आधारमा वर्गीकरण गरिएको छ । जसअनुसार ५ वटा अतिसंवेदनशील, १३७ वटा संवेदनशील र ११ वटा मतदानस्थललाई सामान्य अवस्थाको वर्गीकरण गरिएको छ । 

जिल्ला सुरक्षा समितिले मतदानस्थलहरूलाई भूगोल, सीमा, सडक सञ्जाल लगायतको अवस्थालाई मध्यनजर गर्दै वर्गीकरण गरेको छ । १५३ मतदानस्थलमा ४१६ मतदान केन्द्र तोकिएको छ ।  प्रदेशभरका पनि मतदान केन्द्रलाई सुरक्षाको दृष्टिकोणले अतिसंवेदनशील, संवेदनशील र सामान्य गरी ३ भागमा विभाजन गरेर सोही अनुसारको सुरक्षा तयारी प्रहरीले गरेको छ । १२ वटै जिल्लाका जिल्ला निर्वाचन कार्यालयहरू अहिले चुनावका लागि आवश्यक सामग्रीहरू खरिद, आवश्यक जनशक्तिको आकलनदेखि अन्य आन्तरिक तयारीमा व्यस्त रहेका प्रदेश निर्वाचन कार्यालयले जनाएको छ । लुम्बिनीमा प्रदेशमा पहाडी ६ र तराईका ६ जिल्ला पर्छन् ।