‘उडायो सपना सबै हुरीले...’गीत नसुन्ने सायदै कोही नेपाली होलान् ।

यस गीतका गीतकार तथा गायकबारे जानकारी नहुने संगीतप्रेमी पनि कमै होलान् । मुरलीधर मिझारका यो मात्र होइन्, ‘चिसो चिसो सिरेटोमा...’, निष्टुरीलाई माया गरी आफैलाई रोगी बनाएँ’ जस्ता गीतहरू पनि उत्तिकै लोकप्रिय छन् । 

उसो त मुरलीधर व्यक्ति एक प्रतिभा अनेक भएका कलाकार हुन् । उनी अभिनेता हुन् । फिल्म लेखेका छन् । निर्देशन गरेका छन् । गीत गाउने र कम्पोज गर्ने भइहाल्यो ।

थुप्रै हिन्दी, नेपाली चलचित्र, सिरियलमा अभिनय गरेका छन् उनले । यसकारण नेपालमा मात्र नभएर मुम्बईमा समेत उनको उत्तिकै ख्याती छ ।

यद्यपी, गायक र अभिनेताका रुपमा सक्रिय रहेपनि उनी नेपाली म्युजिक भिडियोमा भने अहिलेसम्म अभिनय गरेका थिएनन् । 

अब, दर्शकले मुरलीधरलाई म्युजिक भिडियोमा समेत देख्न पाउनेछन्, त्यो पनि केही दिनमै । 

आफ्नै स्वर रहेको ‘छटपटीएको त्यो दिन फेरी किन याद आयो’बोलको वियोगान्त खालको गीतमार्फत मुरलीधरले नेपाली म्युजिक भिडियो अभिनयमा समेत आफूलाई समाहित गराएका हुन् । 

यो बन्दोबस्तो भने गीतकार एवं संगीतकार सुनिल मास्केले मिलाएका हुन् । 

गीतकार एवं संगीतकार मास्केले यो गीतपनि ‘उडायो सपना सबै हुरीले’ जस्तै एक लाइनकै गीत रहेको बताए । 

‘धुरलीधरजीकै लागि भनेर यो गीत लेखेँ र कम्पोजिशन गरेँ’–गीतकार एवं संगीतकार सुनिल मास्केले लोकान्तरसँग सुनाए, ‘अहिले उहाँ काठमाडौं आउनुभएको थाहा पाएपछि भोलिपल्ट एरेन्जमा दिएँ । पर्सीपल्ट गीत रकर्ड भयो ।’ 

प्रदीप श्रेष्ठले भोलिपल्ट एरेन्ज गरेको गीतको केही दिनअघि मात्रै भिडियो सुटिङ भएको हो ।

युवराज वाइवाको निर्देशन रहेको भिडियोमा मुरलीधरले अभिनय गरेका छन् ।

निर्देशक वाइवाले मुरलीधरलाई भिडियोमा अभिनय गराउनु आफ्नो लागि ठूलो अवसर भएको प्रतिक्रिया दिए ।

उनले कलाकार मुरलीधरबाट आफूले धेरै कुराहरू सिक्ने अवसर समेत पाएको बताए ।

दीपक गिरीको छायाँकन रहेको भिडियो विकास दाहालमार्फत सम्पादन भएर केही दिनमै सार्वजनिक हुने निर्देशक वाइवाले लोकान्तरसँग बताए ।