कुल गार्हस्थ उत्पादन (जीडीपीमा)मा बाग्मती प्रदेशको सबैभन्दा बढी १७ खर्ब ९१ अर्ब रुपैयाँसहित ३६.९ प्रतिशत योगदान गर्ने अनुमान गरिएको छ ।

नेपालको अर्थतन्त्रमा सबैभन्दा कम हिस्सा भने कर्णाली प्रदेशको रहेको छ । देशको कुल गार्हस्थ्य उत्पादनमा कर्णाली प्रदेशको हिस्सा ४.१ प्रतिशत अर्थात् १ खर्ब ९८ अर्ब मात्रै योगदान हुने तथ्यांक रहेको छ ।

अघिल्लो वर्ष समग्र राष्ट्रिय उत्पादनमा बाग्मती प्रदेशको मात्र ३७.७ प्रतिशत रहेको थियो । गत आर्थिक वर्षको तुलनामा बाग्मती प्रदेशको कुल गार्हस्थ्य उत्पादनमा योगदान घटेको विभागको तथ्यांकले देखाएको छ । केन्द्रीय तथ्यांक विभागका निर्देशक गणेशप्रसाद आचार्यले प्रदेशस्तरीय आर्थिक वृद्धिदर राष्ट्रिय आर्थिक वृद्धिदरनजिक रहेको बताए । उनले नेपालको कुल गार्हस्थ उत्पादनमा प्रदेश तहमा सबैभन्दा धेरै बाग्मती प्रदेशको योगदान रहेको बताए ।

तथ्यांक विभागले चालू आर्थिक वर्ष २०७८÷७९ मा बाग्मती प्रदेशको आर्थिक वृद्धिदर ६.७ प्रतिशतले वृद्धि हुने प्रक्षेपण गरेको छ । त्यस्तै, गण्डकी प्रदेशको आर्थिक वृद्धिदर ६.१७, कर्णालीको ५.४७, प्रदेश १ को ५.४१, लुम्बिनीको ५.३६, सुदूरपश्चिमको ४.९३ र मधेस प्रदेशको ४.८२ प्रतिशत रहेको विभागले जनाएको छ । कुल गार्हस्थ्य उत्पादनमा पनि बाग्मती प्रदेशको हिस्सा सबैभन्दा बढी छ ।

कुल गार्हस्थ्य उत्पादनमा यस प्रदेशको हिस्सा ३६.९, प्रदेश १ को १५.७, लुम्बिनीको १४.१, मधेसको १३.२, गण्डकीको ८.९, सुदूरपश्चिमको ७ र कर्णाली प्रदेशको ४.१ प्रतिशत रहेको छ । यस आर्थिक वर्ष देशको कुल गार्हस्थ्य उत्पादन (उपभोक्ता मूल्यमा) ५.८ प्रतिशतले बढेको विभागको भनाइ छ । गत आर्थिक वर्ष ४.२ प्रतिशतले बढेको थियो । यस आवमा राष्ट्रिय वार्षिक कुल गार्हस्थ्य उत्पादन ४८ खर्ब ५२ अर्ब (उपभोक्ता मूल्यमा) हुने अनुमान गरिएको छ ।

अघिल्लो आर्थिक वर्षमा बाग्मतीको ३७.७ प्रतिशत, प्रदेश १ को १५.६ प्रतिशत, गण्डकी प्रदेशको ८.७ प्रतिशत, लुम्बिनी प्रदेशको १४.० प्रतिशत, मधेस प्रदेशको १३.२ प्रतिशत, सुदूरपश्चिम प्रदेशको ६.९ प्रतिशत र कर्णाली प्रदेशको ४.० प्रतिशत रहेको थियो ।

चालू आर्थिक वर्षको ६ महिनादेखि नौ महिनाको आर्थिक गतिविधि, प्रशासनिक तथ्यांकलगायत मुख्य १८ वटा सूचकलाई आधार मानेर कुल गार्हस्थ्य उत्पादन प्रदेश तहको योगदान र आर्थिक वृद्धिदरको तथ्यांक सार्वजनिक गरेको बताएको छ । आर्थिक वर्ष २०७७÷७८ लाई आधार वर्ष मानेर तथ्यांक मापन गरिएको विभागले बताएको छ ।

प्रदेश १ को कुल गार्हस्थ्य उत्पादन ७ खर्ब ६३ अर्ब रुपैयाँ पुग्ने अनुमान छ । गत आर्थिक वर्ष यस प्रदेशको कुल गार्हस्थ्य उत्पादन ६ खर्ब ७६ अर्ब रुपैयाँ रहेको थियो । गत आर्थिक वर्ष ४.३ प्रतिशत आर्थिक वृद्धिदर हासिल गरेको यस प्रदेशले चालू आर्थिक वर्ष ५.४ प्रतिशतको वृद्धिदर हासिल गर्ने लक्ष्य राखिएको छ ।

यसैगरी, लुम्बिनी प्रदेशको ६ खर्ब ८४ अर्ब, मधेस प्रदेशको ६ खर्ब ४४ अर्ब, गण्डकी प्रदेशको ४ खर्ब ३२ अर्ब, सुदूरपश्चिम प्रदेशको ३ खर्ब ३९ अर्ब र कर्णाली प्रदेशको १ खर्ब ९८ अर्ब कुल गार्हस्थ्य उत्पादन पुग्ने अनुमान विभागले गरेको छ । मधेस प्रदेशको गत आर्थिक वर्ष वद्धिदर ३.८ प्रतिशत रहेकोमा चालू आर्थिक वर्ष ४.८ प्रतिशत कायम हुने अनुमान गरिएको छ । यसैगरी, गण्डकी प्रदेशको आर्थिक वृद्धिदर ६.२ प्रतिशत पुग्ने अनुमान गरिएको छ । गत आर्थिक वर्ष यस प्रदेशले ३.७ प्रतिशत आर्थिक वृद्धिदर हासिल गरेको थियो । गत वर्ष ४.१ प्रतिशत आर्थिक वृद्धिदर हासिल गरेको लुम्बिनी प्रदेशले चालू आर्थिक ५.४ प्रतिशत कायम हुने देखिएको छ ।

यसैगरी, कर्णाली प्रदेशले गत आर्थिक वर्ष ४.३ प्रतिशत आर्थिक वृद्धिदर हासिल गरेकोमा चालू आर्थिक वर्ष ५.५ प्रतिशत वृद्धिदर हासिल गर्ने विभागले प्रक्षेपण गरेको छ । यसैगरी, सुदूरपश्चिम प्रदेशले गत आर्थिक वर्ष ४.२ प्रतिशत आर्थिक वृद्धिदर हासिल गरेकोमा चालू आर्थिक वर्ष ४.९ प्रतिशत हुने अनुमान छ । राष्ट्रिय कुल गार्हस्थ्य उत्पादनमा सबैभन्दा धेरै योगदान बाग्ममी प्रदेशको ३६.९ प्रतिशत रहेको छ । यसैगरी, प्रदेश १ को १५.९ प्रतिशत, लुम्बिनी प्रदेशको १४.१ प्रतिशत, मधेस प्रदेशको १३.२ प्रतिशत, गण्डकी प्रदेशको ८.९ प्रतिशत, सुदूरपश्चिमको ९ प्रतिशत र कर्णाली प्रदेशको ४.१ प्रतिशत रहेको छ । राजधानी दैनिकमा पूर्णभक्त दुवालले खबर लेखेका छन् ।