नेकपा माओवादी केन्द्र गण्डकी प्रदेश समितिले ताराखोला गाउँपालिकाका बागी उम्मेदवार निवर्तमान अध्यक्ष प्रकाश घर्ती मगरलाई साधारण सदस्यसमेत नरहने गरी कारबाहीको सिफारिस गरेपछि यहाँ स्थानीय तह निर्वाचनको गतिविधि थप रोचक बनेको छ । 

स्वतन्त्र उम्मेदवारी दिएर पुतली चुनाव चिह्न लिएर प्रचारप्रसारमा हिँडिरहेका घर्तीले फेसबुकमार्फत आफूलाई पार्टीले कुनै कारबाही नगरेको र पार्टी छाडेर कतै पनि नगएको बताइरहेका छन् । पार्टीले गरेको अन्यायका विरुद्ध आफूले स्वतन्त्र उम्मेदवारी दिएको उनको भनाइ छ । 

तर, चुनावी सभामा बोल्दै नेकपा माओवादी केन्द्रका केन्द्रीय सदस्य तथा गण्डकी प्रदेश सदस्य दीपा घर्ती मगरले कोही व्यक्तिले ताराखोलाको विकास नगरेको र पार्टी नै सबैभन्दा ठूलो रहेको बताउँदै स्वतन्त्र उम्मेदवारी दिएकाले प्रकाश घर्तीमगरले आफू माओवादी हुँ भन्न नमिल्ने बताएकी छन् ।

त्यस्तै माओवादी केन्द्र ताराखोला गाउँपालिकाका इन्चार्ज पदम खत्री दिवसले प्रकाश घर्तीलाई पार्टीले निस्कासन गरिसकेका कारण जनतालाई नझुक्किन र गठबन्धनको उम्मेदवारलाई मतदान गर्न अनुरोध गरेका छन् ।

माओवादीको आधार इलाका मानिएको ताराखोलामा यसपालिको निर्वाचन रोचक बन्दैछ ।